Movementu Pueblo Boneriano (MPB) a manda un karta awe, 13 di yüli pa lider di frakshon di Union Patriotiko Boneiru (UPB), Sr. B. Dirksz, ku e partido ta konsiderá ku e koalishon aktual a yega na un punto krítiko, despues di desaroyonan relashoná ku e puesto di diputado.

Segun MPB, despues ku UPB a informá Sr. Joselito Statia ku nan no ke sigui traha kuné komo diputado, Statia a retirá su mes for di e funshon. A konsekuensia di esaki, Gezaghèber a tuma e inisiativa pa invitá e frakshonnan di koalishon na un reunion na ofisina di Kolegio Ehekutivo pa papia tokante e situashon.

Durante e reunion, MPB a indiká ku e partido ta deseá pa Sr. Joselito Statia bolbe asumí su funshon komo diputado. Segun MPB, UPB a indiká ku nan lo duna un reakshon no mas tardá djamars, 7 di yüli 2026. Sinembargo, MPB ta señalá ku te awe e partido no a risibí ningun kontesta di UPB, ni verbalmente ni por eskrito.

Djabièrnè último, MPB ta indiká ku a konstatá pa medio di prensa ku UPB a pidi un reunion públiko di Konseho Insular pa dia 21 di yüli 2026, ku komo punto di agenda, instalashon di un diputado nobo.

A base di e desaroyonan aki, MPB ta konsiderá ku UPB no tin intenshon mas pa sigui traha den e koalishon aktual ku MPB. Segun e partido, e situashon ta indiká ku un koalishon nobo por ta den formashon.

MPB a sera su karta deseando UPB éksito den e koalishon nobo ku, segun nan, parse ku ya ta tumando forma.

E posishon di MPB por resultá den un retiro di sosten formal for di e koalishon aktual, loke lo habri kaminda pa un posibel restrukturashon polítiko i formashon di un koalishon nobo sin partisipashon di MPB. 

Advertisement