Frakshon di MPB a informá lider di frakshon di UPB i partner den koalishon, Sr. Dirksz, ku nan a renominá formalmente Joselito Statia komo diputado pa MPB. Segun MPB, e desishon ta basa riba e nesesidat pa garantisá stabilidat atministrativo i kontinuidat den gobernashon di Boneiru.

Den un karta dirigí na UPB, MPB a referí na e eventonan ku a tuma lugá durante último siman. Riba 18 di yüni 2026, Jolinda Craane a pidi Statia pa entregá su retiro komo diputado. Segun MPB, mesun dia UPB a informá ku no tabatin konfiansa mas den Statia. Dia 29 di yüni 2026, poko promé ku e reunion di Konseho Insular a kuminsá, Statia a entregá su karta di retiro. Inmediatamente despues, UPB a proponé Roy Martina komo diputado nobo.

MPB a indiká ku durante e reunion nan a ekspresá oposishon kontra e proponementu di Martina i ku nan ta mantené e mesun posishon. Segun e partido, e proseso ku a resultá den retiro i intento di nombrashon no ta reflehá prinsipionan di transparensia i ku tumamentu di desishon kuidadoso ta esensial pa bon gobernashon.

E partido a rekordá ku apenas tres luna pasá, UPB, MPB i Frakshon Serberie a firma e Mini-Programa di Gobernashon 2026–2027 bou di e lema “Ordená | Stabilisá | Avansá”. Den e dokumento, e partnernan di koalishon a komprometé nan mes na fortalesé konfiansa públiko, mehorá gobernashon i atendé dosiénan prioritario pa Boneiru.

MPB ta enfatisá ku e retiro di Statia no a tuma lugá riba su propio inisiativa i ku su salida a generá preokupashon den diferente sektor di komunidat i aparato gubernamental. Segun e partido, esaki ta reflehá apresio pa e trabou ku Statia a realisá den su funshon.

Na interes pa mantené un gobièrnu stabil, MPB a deklará ku Statia a indiká su disponibilidat pa aseptá e funshon atrobe. Pa e motibu ei, e partido ta pidi su reinstalashon komo diputado wòrdu atendé ku urgensia, teniendo na kuenta e diferente dosiénan importante ku aktualmente ta pendiente.

MPB a suprayá e nesesidat di kreá un mekanismo struktural di konsulta entre partnernan di koalishon. Segun e frakshon, un sistema basá riba konfiansa mutuo, igualdat i transparensia lo yuda prevení konfliktonan similar den futuro i fortalesé kolaborashon polítiko na benefisio di Boneiru.

E partido a indiká ku e ta sperá ku e nominashon lo risibí konsiderashon positivo pa logra mas stabilidat polítiko i atministrativo den e isla.

Advertisement