Un grupo di organisashonnan sosial i ekspertonan lokal na Boneiru i Hulanda Oropeo a presentá nan bista i opheshon tokante 'Nationale Klimaatadaptatiestrategie' (NAS) 2026 nobo. E grupo, ku ta inkluí Greenpeace Hulanda, Wereld Natuur Fonds, STINAPA, union di piskadónan Piskabon, kooperativa di agrikultura Kriabon i Mangrove Maniacs, ta eksigí un kambio denmmaneho di gobièrnu na Den Haag.

Segun e grupo, e strategia aktual ta kontené prinsipalmente promesanan bashi pa Boneiru, miéntras ku ya kaba nan ta enfrentá rísikonan grandi pa nan finansa i salú. E reakshon aki ta bini algun luna despues di desishon den 'Kaso di Klima Boneiru' (yanuari 2026), kaminda korte a sentensiá, ku Estado Hulandes ta diskriminá habitantenan di Boneiru i ta violá nan derecho humano dor di no protehá nan sufisiente kontra kambio di klima.

Diferensia den fondonan i planifikashon

Ounke Hulanda Karibense tin un lugá formal pa promé biaha den e plan aki pa henter reino, e grupo ta remarká ku tin un gran diferensia den e aserkamentu. Eline Bosman, direktor di programa di Greenpeace Hulanda, ta splika ku miéntras ku tin bionnan di euro disponibel pa plannan na Hulanda Oropeo, pa Boneiru no tin fondo reservá, sino solamente un 'eksplorashon pa rekurso'. Tambe medidanan konkreto pa Boneiru ta bashi, si kompará nan ku esnan pa Hulanda Oropeo, loke ta nifiká ku no tin un protekshon igual.

Segun e organisashonnan, krisis di klima ta un menasa real pa salubridat públiko, siguridat i kultura na Boneiru. Subida di temperatura ta afektá spesialmente personanan vulnerabel, manera mucha i ansiano. Ademas, sekura ekstremo ta afektá agrikultura lokal, i subida di nivel di laman ta formá un rísiko pa fasilidatnan klave, manera hospital.

Eksigensia pa Gobièrnu Hulandes

Den e dokumento formal ku a keda presentá, e grupo ta formulá kuater eksigensia prinsipal pa gobièrnu hulandes. Pa kuminsá, nan ta eksigí protekshon igual. Nivel di siguridat i ambishon na Boneiru mester ta igual na esun di Hulanda Oropeo, teniendo na kuenta ku e konteksto i realidat lokal.

Na di dos lugá, mester tin finansiamentu struktural i direkto. E grupo ta pidi pa habri 'Deltafonds' Hulandes pa Hulanda Karibense pa asina garantisá fondo nesesario pa adaptashon di klima.

Na di tres lugá, e organisashonnan ta boga pa outonomia lokal i responsabilidat. Implementashon di solushon mester ta den man di komunidat lokal, usando konosementu tradishonal di Boneiru, ounke ku Den Haag ta keda responsabel final pa protekshon.

Finalmente, e grupo ta enfatisá importansia di hustisia sosial i kambio di sistema. E fondonan mester bai na promè lugá pa bario i ekosistemanan mas vulnerabel, sufriendo pa motibu di strès di kalor, skarsedat di awa òf pobresa energétiko, i tambe pa sektor di peska i agrikultura sostenibel.

Análisis finansiero di e situashon

E grupo ta basa nan argumentonan riba un estudio resien di Grant Thornton tokante finansiamentu di klima. E datonan ta mustra ku e kosto pa duna protekshon efektivo na Boneiru ta entre 1.2 i 1.8 bion dòler. Si gobièrnu skohe pa no hasi nada, e daño por subi te na 5.6 bion dòler pa 2050. E kálkulonan aki ta indiká ku e kosto di no hasi nada ta signifikativamente mas haltu ku e invershonnan nesesario.

Konsulta públiko te ku 20 di yüli

E konsulta online di gobièrnu ta e oportunidat formal pa siudadanonan kompartí nan opinion i punto di bista ku Den Haag. Greenpeace Hulanda I gruponan sosiall di Boneiru ta hasi un yamada na tur organisashon, empresario, i residente di Boneiru pa tuma akshon promé ku e fecha di 20 di yüli pa laga skucha nań bos masalmente.

Advertisement