Krísis polítiko i di gobernashon na Boneiru a keda fuertemente señalá den Tweede Kamer na Hulanda. Durante e debatenan riba e presupuesto di Relashonnan di Reino pa aña 2027, miembro di parlamento hulandes Elmar Vlottes (PVV) a ekspresá su gran preokupashon pa e situashon na Boneiru i a presentá un moshon pa pone Bestuurscollege i Eilandsraad di Boneiru bou di supervishon i kòntròl direkto konosí komo ‘curatele'.

Segun e parlamentario di PVV, e situashon aktual na Boneiru ta instabil i no ta mustra di tin un solushon na kaminda. Den su diskurso, Vlottes a señalá ku e kambio konstante di koalishon i insidentenan den Bestuurscollege ta stroba e resolushon di e problemanan mas urgente di e pueblo di Boneiru. 

Advertisement

Entre e puntonan ku a keda tresé dilanti ta e presupuesto finansiero pa aña 2027, ku segun e partido no ta reflehá realidat di e isla. Ademas, e situashon ambiental i di salubridat na sitio di desperdisio di Selibon a keda karakterisá komo alarmante. Kasonan do kandela repetidamente, kontaminashon grave i falta di mantenshon adekuá ta eksigí un invershon di miónes di euro pa por keda solushoná i segun PVV e gobièrnu lokal no ta manehando na un manera responsabel.

PVV ta di opinion ku e maneho di suavisa i yudansa sin eksigí responsabilidat no ta funshonando mas. Pa e motibu aki, e partido ta konsiderá ku ta nesesario pa Hulanda tuma mando i kòntròl di e isla mesora. Pa duna peso na e eksigensia aki, miembro di parlamento Elmar Vlottes a entrega un moshon ofisial (Motie 37 020 IV, Nr. 22) riba 8 di òktober 2026 durante e tratamentu di e presupuesto di Relashonnan di Reino.Den teksto di e moshon, Vlottes ta pidi e gobièrnu hulandes pa aktua mesora indikando ku:

"Konsiderando ku e Bestuurscollege ta hasi un desaster di e maneho i ta mas okupá ku diskushon i mal maneho; ta pidi gobièrnu pa pone Bestuurscollege i Eilandsraad di Boneiru bou di 'curatele' i hasi e Rijksvertegenwoordiger responsabel pa gobernashon di e isla."

E moshon lo ta na votashon den sigiente reunion di Tweede Kamer. Si e moshon aki wòrdu aprobá, e lo nifiká ku mando i e tumamentu di desishonnan prinsipal riba na Boneiru lo pasa temporalmente pa e Rijksvertegenwoordiger, kitando e podernan di mas altu for di e polítikonan lokal.