Den oranan lat di atardi riba djasabra 11 di yüli, ‘meldkamer’ sentral a risibí diferente notifikashon tokante molèster kousá pa hóbennan riba ‘fatbike’.

E promé notifikashon tabata relashoná ku molèster na altura di un parke di mucha na Playa Pabou. Mas despues a drenta un otro notifikashon tokante molèster di e mesun grupo di hóben na altura di parke Wilhelmina. Ora polis a yega na e lugánan menshoná, e hóbennan ya no tabata presente.

Di forma proaktivo, polis a para i kontrolá diferente hóben ku nan a topa riba ‘fatbike’ den e área. Polis tambe a papia ku nan tokante nan komportashon i a hasi un apelashon pa tene kuenta ku seguridat di otro hende den tráfiko.

Durante un kòntròl di un ‘fatbike’ na Kaya Libertador Simon Bolivar, a sali na kla ku e baiskel tabata prosedente di ladronisia despues ku e doño a entregá un keho. Polis a konfiská e ‘fatbike’ hòrtá i a detené un hóben hòmber ku ta identifiká komo C.Z.P., di 16 aña di edat, pa enkubrimentu.

KPCN ta indiká ku e último tempu a mira un oumento den molèster kousá pa muchanan riba baiskel den sentro di siudat. Entre e komportashonnan ku ta kousa preokupashon ta kore hòp, kore den grupo grandi mei mei di kaminda, kore sin lus i kore den multitut di hende, poniendo tantu otronan komo nan mes na peliger.

KPCN ta enfatisá ku lo sigui atendé e situashonnan di manera estrikto i, ora ta nesesario, lo tuma medidanan ku ta kuadra ku e situashon.

Debí ku den hopi kaso ta trata di menor di edat, KPCN ta hasi un apelashon na mayornan pa papia ku nan yunan tokante nan komportashon i e konsekuensianan ku por sigui. Maneho iresponsabel di un baiskel por pone seguridat di e hóben mes i di otro partisipantenan den tráfiko na peliger.

KPCN ta rekordá ku ora un baiskel ta kousa molèster, polis por kita e baiskel i hib’é warda di polis.

Advertisement