Qredits Boneiru a inisiá dia 25 di òugùstùs ku un edishon nobo di Agri Business Academy (ABA), un programa edukativo di 13 siman ku ta enfoká riba emprendementu den e sektor agrario.

E edishon aki tin 13 partisipante ku ta haña e oportunidat pa amplia nan konosementu tokante desaroyo di negoshi i oportunidatnan empresarial den agrikultura, krio di bestia i e kadena di produkshon di kuminda.

Advertisement

Segun Qredits Boneiru, e programa ta dirigí na (futuro) empresarionan ku tin interes den e sektor agrario i ku ke eksplorá oportunidatnan pa desaroyá un negoshi den e área. Un di e metanan ta kontribuí na un produkshon di kuminda lokal mas fuerte i sostenibel na Boneiru.

Durante e programa, partisipantenan lo trata diferente tópiko relashoná ku emprendementu, manera desaroyo empresarial, investigashon di merkado, marketing, kalkulashon di kosto i planifikashon finansiero. Tambe lo tin atenshon pa desaroyonan den e sektor agrario, métodonan inovativo di produkshon i oportunidatnan pa fortalesé e kadena di produkshon di kuminda lokal.

Un parti importante di e programa ta desaroyo di un plan di negoshi i plan finansiero propio. Partisipantenan lo traha riba esakipaso pa paso durante periodo di 13 siman.

E programa no ta limitá na produkshon primario. Tambe ta inkluí oportunidatnan den área di prosesamentu di alimento, agregashon di balor na produkto lokal, servisio agrario i otro aktividatnan ku ta forma parti di e kadena di produkshon di kuminda.

Qredits Boneiru ta indiká ku e programa ta destiná pa stimulá emprendementu ku por tin un impakto ekonómiko i, na mes momentu, kontribuí na un suministro di kuminda lokal mas resiliente i duradero.

Pa ehekutá e programa, Qredits Boneiru ta traha ku diferente organisashon i profeshonalnan ku ta kontribuí ku nan konosementu i eksperensia. Ministerio di Asuntunan Ekonómiko i Klima (EZK) ta sostené e programa komo parti di su ambishon pa fortalesé desaroyo empresarial na Boneiru i na otro islanan BES.

E edishon nobo di Agri Business Academy ta sigui e resultado di e edishon anterior i ta enfoká riba amplia konosementu di partisipantenan tokante oportunidatnan i retonan spesífiko di e sektor agrario na Boneiru.