Renobashon di Vèlt Pal’i Tamarein

Deporte

Renobashon di Vèlt Pal’i Tamarein

Pa AC 27 Aug, 2026 5 Min Lesa 35 Bishitante

Trabounan di renobashon na Vèlt Pal’i Tamarein ta avansá segun planifikashon i ta drenta su fase final. Segun aktualisashon duna pa Indebon den kolaborashon ku Fundashon Wega di Number Boneiru (FWNB) i diputado Silberie, e proyekto ta progresando i ta sperá pa keda kompletá den luna di òktober.

E proyekto ta transformá e tereno eksistente den un kancha di yerba multifunshonal moderno, ku lo por akomodá diferente tipo di deporte, inkluyendo rugby, hockey, frisbee i futbòl. E inisiativa ta forma parti di esfuersonan pa mehorá infrastruktura deportivo na Boneiru i kreá mas oportunidat pa deporte i rekreashon.

Ku e renobashon, deportista i organisashonnan deportivo lo haña un fasilidat mas adekuá pa entrenamentu, kompetensia i aktividatnan komunitario. Indebon a ekspresá su deseo pa mira ku e komunidat deportivo ta hasi uso optimal di e kancha nobo i kontribuí na mantené i sigui desaroyá deporte na Boneiru.

Ora e proyekto keda finalisá na òktober, Vèlt Pal’i Tamarein lo bira un di e fasilidatnan deportivo mas versátil na Boneiru, sirbiendo diferente disiplina deportivo na un solo lokalidat.