RIVM, den kolaborashon ku Entidat Públiko Boneiru, a kuminsá ku midimentu di kalidat di airu rònt di Lentfel Lagun. E aktividat ta forma parti di Meetplan Lagun, ku tin komo meta pa kolektá dato tokante kalidat di airu i awa den e área.

Diputado Martinus i sekretario di estado di Infrastruktura i Maneho di Awa, Annet Bertram, a duna e señal ofisial pa start di e plan di midimentu. Durante e okashon, e promé sensornan pa midimentu a keda entregá na Fundashon ProLagun, ku a pone e promé lokashon disponibel pa instalashon di e ekiponan.

Advertisement

Den e lunanan binidero, Entidat Públiko Boneiru i RIVM lo selektá diferente lokashon pa instalá e sensornan. BONLAB lo ta enkargá ku instalashon i mantenementu di e ekiponan. E promé sensornan lo midi partikulan fini den airu (fijnstof), despues lo sigui ku midimentu di otro sustansianan ku aparatonan adishonal. Resultado di e midimentunan lo ta públiko i disponibel pa konsulta online.

Ademas di e plan pa kalidat di airu, RIVM, Entidat Públiko Boneiru i Ministerio di Infrastruktura i Maneho di Awa ta trahando riba un plan pa midi kalidat di awa den suela bou i den entorno di lèntfel. E dato kolektá lo keda usa pa evaluá si tin nesesidat pa tuma medida adishonal pa limitá posibel plamamentu di kontaminashon.

Durante e bishita di trabou, e partidonan a deliberá tokante kambio proponé den Dekreto di Establesimentu i Aktividat BES (IAB BES). Segun e propuesta, Reino lo haña un ròl mas grandi den supervishon di organisashon i empresanan ku ta prosesá sushi.

Den e kuadro aki, Ministerio di Infrastruktura i Maneho di Awa, Inspekshon di Ambiente di Biba i Transporte (ILT) i Entidat Públiko Boneiru a firma un akuerdo di kolaborashon. E akuerdo ta deskribí kon e instansianan lo traha huntu den e periodo binidero riba dunamentu di pèrmit, supervishon i mantenshon di lei relashoná ku prosesamentu di sushi.