Sekretario di Estado di Infrastruktura i Maneho di Awa, Annet Bertram, lo hasi un bishita di trabou na Boneiru riba 28 di ougùstùs. Durante di e bishita, e enfoke prinsipal lo ta riba situashon na e sentro di shushi Selibon Lagun i impakto ku esaki tin riba habitantenan den besindario i riba medio ambiente.

Segun informashon divulgá pa gabinete di e sekretario di estado, Bertram lo bishitá e sentro di shushi Selibon Lagun i lo sostené kombersashonnan ku diferente partido enbolbí. Entre otro, e lo reuni ku representantenan di Fundashon Pro Lagun, un organisashon ku ta representá interesnan di habitantenan den e área, pa tende nan preokupashon tokante efektonan di e problema riba bida diario i riba medio ambiente. Durante di e bishita lo tin deliberashonnan ku gezaghèber, Kolegio Ehekutivo di Entidat Publiko Boneiru i representantenan di Selibon. E reunionnan lo enfoká riba posibel solushon pa desafionan ku ta eksistí na e sentro di shushi, i e ròl di e diferente instansia lokal i nashonal den e proseso.

Advertisement

Gabinete di e sekretario di estado a indiká ku, ounke den e periodo resien a tumá varios paso pa Entidat Publiko Boneiru, Selibon i Reino Hulandes, tin konsenso ku mas medida ta nesesario pa yega na un solushon struktural pa e situashon.

Un otro punto den e programa ta e lansamentu simbóliko di un ret di monitorisashon. Ku aparatonan spesialisá di midimentu lo kolektá dato tokante influensia ku e sentro di shushi por tin riba salú públiko i riba medio ambiente den e área rondó di Selibon Lagun.