Den kuadro di un bishita di trabou na Islanan Abou, Sekretario di Estado Eric van der Burg lo bishitá Boneiru entre 13 i 17 di yüli. Durante su estadia riba na Boneiru, e enfoke prinsipal lo ta riba fortifikashon di kolaborashon den Reino, desaroyo ekonómiko, i protekshon di naturalesa.

Na Boneiru, Van der Burg lo reuní ku Kolegio Ehekutivo pa papia tokante desaroyonan atministrativo mas resien. Entre e tópikonan ku lo ta riba mesa tin progreso di sentro di prosesamentu di sushi, Selibon Lagún, i plannan pa introdusí transporte públiko.

Advertisement

Konservashon di naturalesa ta un otro tema importante durante e bishita. Na Sorobón, e Sekretario di Estado lo hasi un rekorido dor di e palunan di mangel, guiá pa STINAPA Boneiru. Durante e bishita, lo pone énfasis riba protekshon di naturalesa, adaptashon na klima i maneho di medio ambiente.

Van der Burg lo haña un bista tambe di e proyektonan ku ta forma parti di Regiodeal. E lo bishitá diferente lokalidat kaminda ta invertí den mehorashon di logístika, infrastruktura i sostenibilidat. Segun gobièrnu di Reino, un suma total di €13 mion ta disponibel pa proyektonan ku mester kontribuí na prosperidat amplio na Boneiru.

Komo parti di su programa, e Sekretario di Estado lo bishitá fasilidatnan di WEB Bonaire pa haña mas informashon tokante retonan di produkshon di awa di bebe i energia; dos servisio esensial pa komunidat.

E bishita na Boneiru ta forma parti di un bishita di trabou ofisial ku ta inkluí Aruba i Kòrsou.