Frakshon di UPB a manda un karta awe, 14 di yüli, ku ta kontestá dos karta di MPB fechá 6 i 13 di yüli 2026. Den e karta, UPB ta ekspresá su desakuerdo ku vários punto ku MPB a trese dilanti i ta splika e motibunan tras di su desishon polítiko resien.

Segun UPB, e retonan den seno di koalishon no por keda mira solamente di un banda. E frakshon ta deklará ku tabatin un falta di reunionnan regular di koalishon durante un periodo di vários luna i ku intentonan ripití pa organisá deliberashon entre e partnernan di koalishon no a logra duna e resultadonan deseá.

UPB a ekspresá preokupashon pa loke ta trata komunikashon i koordinashon di e eks-diputado pa Desaroyo Espasial (R&O), su koleganan diputado, i e büró asosiá ku e kartera aki. E partido ta indiká ku tabatin un falta di informashon, planifikashon i koperashon den ehekushon di responsabilidatnan asigná.

Mas aleu UPB ta referí na un bishita di trabou na Hulanda organisá dor di èks diputado pa R&O. Segun UPB, e biahe aki no a keda kordiná ni komuniká ku e otro miembronan den Kolegio Ehekutivo. Adishonalmente, un reunion di koalishon programá pa 17 di yüni 2026, na Hulanda no a tuma lugá despues ku a pidi algun minüt promé pa posponé esaki.

A base di esaki, UPB ta deklará ku nan a konkluí ku e koalishon no tabata funshoná na un manera ku e partido ta konsiderá kolegial, transparente i efektivo. Pa e motibu aki UPB ta indiká ku e lo a preferá di sinta den oposishon ku forma parti di un koalishon karakterisá pa komunikashon i kordinashon insufisiente. UPB a anunsiá ku nan lo nominá un representante komo diputado pa e kartera di R&O. E proposishon aki lo keda entregá durante reunion di Konseho Insular programá pa dia 21 di yüli 2026. E partido ta ekspresá ekspektativa ku koalishon lo mustra komprenshon i sostené e proposishon pa nombra e diputado nobo.

Advertisement