Frakshon di Union Patriótiko Boneriano (UPB) a manda un seri di pregunta por eskrito na Kolegio Ehekutivo, spesífikamente dirigí na e diputado enkargá ku Finansa, pa haña klaridat tokante un fondo di aproksimadamente $64 mion destiná pa mantenshon di kareteranan públiko na Boneiru.

E petishon aki, segun artíkulo 45 di Reglamento di Òrdu, ta nase despues di deklarashonnan públiko hasí pa frakshon di un èks diputado. Segun e deklarashonnan aki, e èks diputado lo a logra optené e finansiamentu aki serka Hulanda pa medio di su esfuersonan i negosashonnan personal durante un biahe di trabou na yüni 2026.

Advertisement

UPB ta enfatisá ku e meta prinsipal no ta un diskushon polítiko, sino pa determiná e echonan basá riba atministrashon finansiero ofisial. E frakshon ke pa Kolegio Ehekutivo kontestá e siguiente puntonan klave denter di un plaso di 30 dia:

•  Si ta bèrdat ku tin un suma di $64 mion aprobá pa trabou di kaminda ku tabata resultado di e lobimentu na yüni 2026.
•  Fecha di risibimentu di e desishon ofisial, e instansia ku a fia/dun'é, i kopia di tur karta di kompromiso ofisial.
• Un spesifikashon detayá di kon e medionan pa infrastruktura ta dividí (rekurso propio di OLB, kontribushon di Reino, medionan SPUK, i fondonan ku no tabata asigná ainda promé ku e biahe).
• Determiná si e fondonan aki ya kaba tabata disponibel òf den proseso di petishon komo medionan propio di OLB promé ku e bishita di trabou a tuma lugá.

Segun UPB, pueblo di Boneiru i Konseho Insular tin derechi di haña informashon transparente pa sa eksaktamente di unda e medionan a originá i kiko ta e situashon finansiero real.