Warda Kosta di Karibe Hulandes a lansa un akshon di buskeda despues ku e Maritiem Operatie Centrum a risibí un informe riba un posibel kitesurfer Agusto Corrente di Venezuela perdí ku tabata na kaminda for di Venezuela pa Boneiru. E informe a drenta djarason 20 di mei, despues di kua diferente unidat di Warda Kosta a wòrdu mobilisá inmediatamente.

Segun e boletin ofisial, Avion di patruya Dash 8 di Warda Kosta a kondusí buskedanan te lat den anochi di djarason. Djawebs mainta, 21 di mei, e akshon a sigui ku varios unidat, inkluyendo helikòpter di Warda Kosta. Tambe riba kosta di Boneiru, servisionan di seguridat a yuda den e buskeda.

Te ku awor, outoridatnan no a logra haña ningun pista òf indikashon di e persona perdí.

Warda Kosta a indiká ku si tin mas informashon disponibel, nan lo kompartí esaki ku públiko.

Influencer i kitesurfer Venezolano Augusto Corrente a hala hopi atenshon na kuminsamentu di e aña aki despues ku el a logra hasi un trayekto di kitesurf for di Adícora, Venezuela, pa Aruba. E aventura tabata parti di su proyekto personal “ABC Project”, ku tabatin komo meta bishitá e islanan ABC usando solamente kitesurf.  

Segun medionan Venezolano, Corrente a yega Aruba ilegalmente riba su tabla di kitesurf despues di krusa un distansia grandi riba laman habrí. Outoridatnan Arubiano posteriormente a deten’é pa motibu ku e no a drenta e isla via e proseso migratorio ofisial. Despues di esaki, el a wòrdu deportá bek pa Venezuela.  

E kaso di Corrente a bira viral na kuyminsamentu di aña riba retnan sosial pa motibu di e riesgo grandi ku e trayekto entre Venezuela i Aruba ta representá. Hopi hende a alab’é pa su balentia, mientras otro a señalá e peliger i e aspektonan ilegal di e biahe. E biahe pa Boneiru e biaha aki ta mustra di ta un intento atrobe pa krusa laman di Venezuela pa islanan ABC.

Advertisement