Water- en Energiebedrijf Bonaire (WEB) i Israel Desalination Engineering (IDE Technologies) a firma un akuerdo nobo di koperashon pa un periodo inisial di te ku sinku aña. E akuerdo ta enfoká riba desaroyo, diseño i realisashon di ekspanshonnan i renobashonnan futuro di e instalashonnan di produkshon di awa di bebe na Boneiru.

E firmamentu a tuma lugá na e planta di produkshon di awa di bebe di WEB na Hato, den presensia di miembro di e tim di proyekto, empleadonan di BU-Water, miembro di Hunta di Komisario, representantenan di ámbos organisashon i prensa.

Advertisement

WEB i IDE tin tempu kaba ta kolaborá riba diferente proyekto. Ku e akuerdo nobo, e dos organisashonnan ta establesé un marko pa amplia nan koperashon i traha huntu riba proyektonan di futuro.

Segun WEB, e demanda pa awa di bebe na Boneiru a oumentá ku mas di 10% pa aña durante e último añanan, relashoná ku e kresementu di e isla. Na 2021, WEB a tuma kòntròl kompleto di produkshon di awa di bebe despues di konstrukshon di un instalashon nobo. Ku un ekspanshon di 5.600 m³ pa dia, e kapasidat total di produkshon a alkansá 7.200 m³ pa dia.

Na 2024, e instalashon a wòrdu ekspandé ku un kapasidat adishonal di 2.400 m³ pa dia, elevando e kapasidat total na 9.600 m³ pa dia.

WEB tin plan pa oumentá e kapasidat di produkshon te ku 14.400 m³ pa dia den e próksimo kuater añanan. Si e plan realisá, e kapasidat lo ta dos biaha mas grandi ku e kapasidat di 2021. Desde 2019, WEB ta usa un estrategia di ekspanshon modular. E sistema ta permití amplia kapasidat den diferente fase, segun e nesesidat di produkshon i e desaroyo di Boneiru.

Produkshon di awa di bebe

WEB ta produsí awa di bebe for di awa di laman mediante osmosis reverso. Den e proseso aki, awa di laman ta pasa bou di preshon haltu dor di membranan fini ku ta separá e salu di e awa. WEB a indiká ku desde 2019 e ta traha pa mantené e membrananan sin uso di kímiko pa limpiesa, usando método mekániko. E kompania ta sigui investigá maneranan pa mehorá e sostenibilidat di e proseso i redusí konsumo di energia.

Ademas di amplia e kapasidat di osmosis reverso, WEB tin planiá renobashon i ekspanshon di otro parti di e sistema di produkshon di awa di bebe.

E trabounan ta inkluí:

• Ekspanshon di instalashon di osmosis reverso na Hato;
• Renobashon i ekspanshon di e sistema di post-tratamentu, kaminda e awa ta haña e komposishon i kalidat nesesario promé ku entreg'é na klientenan;
• Renobashon i ekspanshon di e instalashon di entrada di awa di laman i e sistema pa devolvé awa salu konsentrá na laman;
• Modifikashon i ekspanshon di pipamentu i otro infrastruktura pa sostené e oumento di produkshon i distribushon.

WEB ta indiká ku, kaminda ta posibel, e lo kolaborá ku kompanianan lokal pa e realisashon di e trabounan.

Ku e akuerdo nobo, WEB i IDE lo traha huntu den e próksimo añanan riba ekspanshon i renobashon di e instalashonnan, ku e meta pa adapta kapasidat di produkshon di awa di bebe na e demanda kresiente di Boneiru.