A lanta kritikanan ku ta kuestioná legitimidat di selebrashon di “500 aña Rincon”, argumentando ku e fecha ta representá yegada di kolonisadónan Spañó na Boneiru i no e eksistensia real di un pueblo i kultura ku tabata presente muchu promé ku yegada di europeonan.

E narativa ofisial no ta kuadra ku realidat históriko di Boneiru. Pueblo indígena Arawak ya tabata bibando na Boneiru promé ku Spañónan a yega, i ku hopi di desendientenan Afro-Boneriano di awe a yega posteriormente durante periodo di West-Indische Compagnie (WIC) i sklabitut Hulandes. Kon Boneiru por selebrá 500 aña di eksistensia di Rincon si gran parti di e poblashon aktual no tin desendiente di e tempu ei? I si tin hende ku ainda tin rais indígena, nan lo mira e selebrashon aki komo un rekordatorio di destrukshon di nan pueblo.

Den e diskushon, ta argumentá ku e fecha ku ta wòrdu usa pa marka “fundashon” di Rincon ta basa riba momento ku Spañónan a drenta Boneiru, presisamente e periodo ku a keda marká pa kolonialisashon, deportashon di indígenanan i posteriormente sklabitut. No por para ketu i selebrá entrada di poder europeo ku a kaba ku e pueblo originario/indigena. Esaki no ta un fiesta; ta un trouma históriko.

Kritikanan ta mas fuerte despues ku Reino Hulandes i Spaña a apstené na 26 di mart durante un votashon den Asamblea General di Nashonnan Uní tokante un resolushon liderá pa Ghana i sostené pa diferente paisnan di CARICOM. E resolushon tabata pidi pa mas rekonosementu, hustisia i reparashon pa e krímenanan di sklabitut transatlántiko. Ta kontradikshon profundo ku den mesun tempu ku nashonnan Karibense ta lucha pa rekonosementu di e periodo mas kruel den historia humano, Boneiru kier selebrá e momentu ku kolonialismo europeo a kuminsá, kabando ku kasi tur indigena den Rincon.

Diaspora Afrikano i paisnan manera Ghana ta pidiendo hustisia pa sklabitut. Mientras aki na Boneiru, nos ta invitá hende pa selebrá yegada di e mes sistema kolonial ku a habri porta pa eksplotashon humano i sufrimentu.

Advertisement