Un investigashon resien for di Economisch Bureau Amsterdam (EBA) a lanta preokupashon riba nos isla. Resultadonan preliminar ta mustra ku hopi produkto importá for di Nort i Sur Amérika, ku tin di nan ta prohibí na Hulanda i den Union Europeo debí na rísiko serio pa salú ta keda bendí libremente den tiendanan i supermerkadonan na Boneiru.

E investigashon aki a keda enkargá pa Fundashon Tienda pa Konsumidó Boneriano (FTPKB), den kuadro di un kampaña pa krea konsientisashon den komunidat. E problema struktural ta sinta den leinan ku ta indiká ku maske Boneiru ta parti di Hulanda, e isla no ta kai bou di lasonan europeo. Esaki ta nifiká ku produktonan ku no por drenta merkado hulandes, ta drenta Boneiru sin ningun restrikshon via importashon for di Merka.

Segun e datonan di EBA, e konsumidónan na Boneiru ta keda eksponé na supstansianan tòksiko ku por kousa malesanan grave, manera malesanan di kurason ku konsekuensia di ataka di kurason, iritashonnan fuerte di kueru i tambe diferente forma di kanser.

E estudio ta enfatisá ku Union Europeo tin un kòntròl hopi mas estrikto kompará ku Boneiru i a prohibí substansialmente produktonan di remedi i kímikonan ku ta keda importá for di eksterior.

Ehèmpelnan di stòf peligroso ku ta permití na Merka pero prohibí na Europa ta numeroso. Un par di ehèmpel klave ta:

• Kosmétika: Na Merka ta permití stòfnan manera "parabeno i ftalato" ku a keda prohibí na Europa pasobra a keda prueba ku nan ta kousa problema di hormona i tin efektonan pa embaraso i sistema di reprodukshon.
• Kuminda: Na Merka ta usa aditivonan manera "bromato di potasio" ku ta asosiá ku kanser i "ractopamina" ku ta oumentá rísiko di desòrdu di kurasón, kualnan ta strukturalmente prohibí den Union Europeo.
• Pestisida: Kímikonan manera "dicrotophos i mancozeb", uzá den agrikultura na Merka, ta prohibí na Europa debí na e daño fatal ku nan ta kousa na e sistema di nèrvio i reprodukshon humano.

E investigashon di EBA te awor a enfoká prinsipalmente riba diferensianan den legislashon entre Europa i Merka i kon e produktonan aki por yega merkado boneriano. Den e siguiente fase, investigadónan lo analisá produkto spesífiko ku ta disponibel riba Boneiru pa determiná kua supstansia dañino ta realmente presente i kua riesgo nan ta representá pa konsumidó.

FTPKB ta indiká ku e estudio ta parti di un kampaña di konsientisashon pa informá i protehá konsumidónan riba Boneiru tokante posibel riesgo di produkto importá.

Advertisement