Fin di mei awor, e barku Augusta Luna lo sali for di haf di Kralendijk rumbo pa Rotterdam transportando mas ku 7 tòn di sushi biomédiko di hospital. Esaki ta di 13 biaha ku e kompania prosesadó di shushi, Selibon NV, ta ehekutá e transporte aki pa deshasí di un manera duradero i responsabel di shushi biomédiko. 

Material médiko desechá di hospital, konosí komo shushi biomédiko, ta keda konsiderá un frakshon di shushi peligroso debí na e rísiko altu di kontaminashon. Pa e motibu aki, su maneho ta someté na regulashonnan internashonal sumamente estrikto.

Huntu ku e produktornan i prosesadónan, Selibon NV a logra sigurá un kadena sostenibel ku ta kubri for di e rekohé, transporte, empaketá, eksportashon i e prosesamentu final na Hulanda. Pa logra esaki, a establesé proseduranan estrikto lokalmente i a kumpra rekursonan spesialisá, banda di a invertí den formashon di personal.

Eksito pa deshasí di shushi biomédiko, awor ta un eksperensia di gran balor pa Selibon NV, ya ku e meta ta pa apliká e mes un método sostenibel aki riba otro frakshonnan di desperdisio.

Segun Selibon NV, tin hopi trabou ketu bai pa duna un solushon definitivo na e problema, spesialmente mirando ku Boneiru tin e vishon pa no sigui usa lèntfel den futuro. Mirando e desaroyo aki i e oumento den un ekonomia di resiklahe, eksportashon struktural di diferente tipo di shushi lo mester bira e norma i e práktika standart pa Selibon NV den e próksimo añanan.

Advertisement