Resientemente, miembro di Konseho Insular, James Kroon, a dirigí un komunikado kaminda e ta lansa krítikanan fuerte kontra di èks diputado Clark Abraham. Segun Kroon, durante e periodo di gobernashon anterior, henter Boneiru a sufri bou di un paralisashon kaminda proyektonan i petishonnan na gobièrnu a keda stanká, sin ku tabatin kontesta òf solushon pa e pueblo.

Kroon ta splika ku e gobièrnu nobo a kuminsá ku un inventarisashon pa deskubrí di kon e trámite i desishonnan tabata wantá asina tantu. Segun e polítiko, e kousa prinsipal ta desishonnan deskabeyá ku e gobièrnu di Abraham a tuma for di inisio di desèmber 2023.

Den e komunikado e ta enfatisá ku e dekreto aki a brua henter e aparato di gobièrnu. Kroon ta splika e motibu tabata paso Clark Abraham a duna delaster un tarea di gobièrnu na sekretario di Kolegio Ehekutivo, esta 'Eilandsecretaris'. Asina aki, e gobièrnu di Clark Abraham a kibra pia di tur e direktornan di e aparato. Konsekuensia di esaki ta ku nada no a sigui kana i tur kos a pega.

E dekreto di Clark Abraham di promé di desèmber 2023 no a laga niun tarea chikitu ni grandi afó. El a konsentrá e responsabilidat pa un persona:

• Tur kompra i pago di faktura (Pág. 2)
• Tur pèrmiti di parto, bira malu i asuntunan di personal (Pág. 3)
• Tur pèrmit di konstrukshon, erfpacht, tereno i negoshi (Pág. 4)
• Tur konekshon di awa, sankshon di urgensia, sédula i kasonan di korte (Pág. 5)

Esaki ta e definishon legal di un "sentralisashon total". Pa un solo ofisina atendé ku miles di petishon di asuntunan diario di un isla kompletu, esaki a krea un paralishon outomátiko. Kroon ta tildá e maneho anterior di tabata basá únikamente riba "primintimentu so", sin duna e tools i outonomia nesesario na e direktornan di departamento pa nan por a ehekutá nan tarea di forma efikas.

Komo miembro di Konseho Insular, James Kroon a probechá pa lansa un yamada urgente na Kolegio Ehekutivo aktual pa hasi kambio drástiko ku lo restablesé e efektividat den gobernashon paso pueblo ta sklama pa solushon i kontesta riba nan petishonnan.

Kroon a añadi den su komuikado e dekreto di promé di desèmber 2023 kual e ta konsiderá e foko di e problema atministrativo ku nos isla a pasa aden.

Advertisement