College financieel toezicht Bonaire, Sint Eustatius en Saba (CFT) a indiká ku, segun e promé “uitvoeringsrapportage” di 2026, Gobièrnu di Boneiru probablemente ta kumpli ku e norma sentral di presupuesto stipulá den Lei FinBES. Den un karta manda na presidente di Bestuurscollege, John Soliano, e instituto di supervison finansiero a bisa ku e resultado ta mustra mehorashon fuerte kompará ku e mesun periodo na 2025.

Segun CFT, e realisashon di entrada finansiero a subi te 30%, mientras gastu a yega 26% di loke a wòrdu presupuestá pa 2026. Sin embargo, CFT a indiká ku tin motibu pa mantené preokupashon, spesialmente debí na e manera ku obligashonnan finansiero a wòrdu registrá.

E karta ta señalá ku sin konsiderá ku obligashonnan (verplichtingen), e realisashon di gastu a baha te solamente 16%. Pa esei, CFT ta pidi gobièrnu lokal pa duna mas klaridat tokante realisashon, distribushon i obligashonnan finansiero.

Entre e rekomendashonnan prinsipal, CFT ta insistí ku:

• E toelichting riba obligashonnan mester mehorá; 
• Boneiru mester sigui aumentá kalidat di raport finansiero; 
• Gobièrnu mester sigui entregá datos den kategorianan ekonómiko pa mihó transparensia. 

CFT tambe a bisa ku e sekretario di estado pa Relashonnan den Reino a aprobá un ekstension pa Boneiru entregá su di dos presupuesto-modifikashon di 2026. Awor e dokumento ta sperá pa 1 di yüni 2026.

Den e promé kuartal di 2026, Boneiru a registrá USD 31.8 miyon na entrada i USD 27.6 miyon na gastu. Entrada di belasting lokal, manera impuesto riba outo i belasting turistiko, tabata mas haltu ku loke tabata sperá debí na un bon temporada pa e sektor di turismo.

Na mes momentu, CFT a indiká ku falta sufisiente splikashon riba algun gastu i invershonnan kual ta hasi evaluashon kompletu difísil.

Advertisement