Outoridatnan di salubridat na Hulanda ta sigui monitoriá un kaso di hantavirus ku ta relashoná ku un buelo di KLM for di Johannesburg pa Amsterdam. Segun diferente medio internashonal, un empleado di kabina di KLM a wordu hospitalisá preventivamente despues di kontakto ku un pasahero ku posteriormente a fayesé.

E pasahero, un muhé Hulandes di 69 aña, tabata abordo di buelo KL592 for di Sudafrika. Segun informashon publiká, e muhé a wordu saka for di avion promé ku e buelo a sali pa Amsterdam debí na su estado di salú ku a deteriorá rapidamente. E persona posteriormente a fayesé den un hospital na Johannesburg.

Outoridatnan di salubridat na Hulanda ta investigando si tin otro personanan ku por a wòrdu eksponé na e virus. Segun rapòrtnan, mas ku 300 pasahero i tripulante ta wòrdu kontaktá komo parti di un investigashon di rastreo.

E kaso ta konektá ku un outbreak di hantavirus abordo di e barku di ekspedishon MV Hondius. Diferente pais ta sigui desaroyo di e situashon i ta monitoriá pasaheronan ku a biaha ku e barku. Te ainda, diferente infekshon sospechá i varios fayesementu a wordu raportá.

Ekspertonan ta indiká ku e "strain" embolbí posiblemente ta Andes hantavirus, un variante ku den kaso limitá por transmití entre personanan. Apesar di esaki, outoridatnan internashonal ta enfatisá ku e riesgo pa públiko general ta konsiderá abou.

Advertisement