Representantenan di e organisashonnan di kuido Fundashon Mariadal, Fundashon Kuido Ambulante Bonaire (FKAB), Mental Health Caribbean (MHC), Sentro Mediko Boneiru (SMB), St. Eustatius Health Care Foundation (SEHCF) i Saba Cares, hunto ku representantenan di e sindikatonan AFBW, ABVO, CNV i Unie, a partisipá den negoshashonnan intensivo entre 24 te ku 28 di ougùstùs 2026 pa yega na un CAO ZORG BES nobo.

Despues di sinku dia di deliberashon, partidonan a disidí pa suspendé negoshashonnan, pasobra no a logra un akuerdo riba e punto mas importante: introdukshon di un siman laboral di 36 ora. A pesar di e impase, tur partido ta di akuerdo ku e prinsipio di igualdat den kondishonnan laboral entre e islanan BES i Hulanda Europeo.

Advertisement

Partidonan a indiká ku e diferensianan mas importante ta implementashon di e siman laboral di 36 ora, nivel di salario i areglonan di penshun. Segun tur partido, e meta komun ta pa empleadonan den e sektor di kuido na Boneiru, Sint Eustatius i Saba por konta ku kondishonnan laboral komparabel ku nan koleganan den Hulanda Europeo.

E medida lo kontribuí na un mihó balansa entre trabou i bida personal, mas vitalidat di empleadonan i un posishon mas fuerte di merkado laboral den sektor di kuido. Organisashonnan di kuido, no opstante, ta indiká ku e medionan finansiero nesesario pa realisá e kambio ainda no ta disponibel.

Sigiente paso ta den deliberashon

Despues di sinku dia di negoshashon intensivo, partidonan a konkluí ku no tabata posibel pa yega na un akuerdo na e momento aki. E estado aktual di e negoshashon a keda registrá den un konvenio di suspenshon temporal, mientras ku partidonan ta deliberá sigiente paso.

Apesar di e resultado, empleadonan i sindikatonan a reafirmá nan kompromiso pa sigui buska manera pa mehorá e kondishonnan laboral den sektor di kuido na Boneiru, Sint Eustatius i Saba.

AFBW ta pidi posishon kla 

Den medio di e diskushon, Algemene Federatie van Boneriaanse Werknemers (AFBW) a manda un karta na Eilandsraad i Bestuurscollege di Boneiru, pidiendo un posishon formal riba introdukshon di siman laboral di 36 ora.

Den e karta, firma pa presidente Cherel Kwidama, AFBW ta argumentá ku e tema no ta solamente un asuntu di Reino òf di finansiamentu for di Hulanda, sino tambe un responsabilidat di gobernashon lokal.

AFBW ta pone enfasis ku e siman laboral di 36 ora ta un norma ku ta eksistí na Hulanda desde 1997 pa promové un karga laboral salú i sostenibel. Segun e organisashon sindikal, despues di 10-10-10 e islanan BES a bira un parti integral di Hulanda, i pa e motibu ei e mesun normanan mester apliká na Karibe Hulandes.

E federashon ta rekordá ku Openbaar Lichaam Bonaire mes a rekonosé e liña di maneho aki i a implementá siman laboral di 36 ora pa su propio empleadonan, manera tambe pa empleadonan di RCN ku ta traha na Boneiru.

Petishon pa akshon promé ku reunion di Reino

AFBW ta pidi Eilandsraad i Bestuurscollege pa tuma un posishon formal promé ku reunion di vaste commissie voor Veiligheid, Welzijn en Zorg voor Koninkrijkszaken (Caribisch Nederland), planifiká pa 9 di sèptèmber 2026.

Segun e federashon, e deklarashon mester rekonosé ku siman laboral di 36 ora ta norma pa Boneiru. AFBW ta indiká ku nan petishon no ta pa pidi pa mas fondo, sino pa logra klaridat gubernamental i liderasgo polítiko.

"Falta di liderasgo lokal por resultá den un situashon unda trahadónan na Boneiru ta keda ku un karga laboral mas haltu ku nan koleganan na Hulanda Europeo," AFBW ta argumentá.

Den e mesun karta, AFBW ta pidi permit pa presentá su puntonan komo insprekers den un próksimo reunion di Eilandsraad.