Durante charla edukativo siman pasá riba inklushon LGBTQ+ na Boneiru, a bini dilanti ku e situashon di salú mental bou di e grupo akí ta alarmante. Renata Domacassé, sikólogo na Mental Health Caribbean (MHC), a duna detaye di kon e preshon sosial i falta di aseptashon ta afektá e personanan akí.

E enkuentro tabatin komo meta prinsipal pa krea konsientisashon, destruí tabú i promové un ambiente di rèspèt den nos komunidat. Domacassé a splika ku pa via di kòntròl sosial i pensamentu riba un isla chikí, hopi biaha desaroyo di identidat propio ta keda influensiá pa loke otro hende ta pensa. Falta di un espasio seif pa ekspresá identidat tin konsekuensianan serio pa salú mental, manera kasonan di depreshon, ansiedat i trauma, tantu serka adolesente komo adulto mayor.

Den e mes un charla tambe a keda enfatisá ku e problema di salú mental i rísiko bou di komunidat LGBTIQ+ ta konsiderablemente mas altu kompará ku populashon general, spesialmente bou di personanan transgender. E falta di un espasio i falta di seguridat pa e grupo akí por hiba personanan aki den kondishon i situashonnan mental i físiko grave.

Pa solushoná i frena diskriminashon, a hasi un yamada na komunidat pa keda uní, habrí i basá riba balor fundamental ku ta rèspèt. Segun e presentashon, no por permití ku sierto derechonan ta kondusí na eksklushon di un grupo pa motibu di sierto pensamentunan personal òf religioso. Rekonosé dignidat i duna rèspèt independiente di orígen òf orientashon ta keda mirá komo base pa un sosiedat sólido i fuerte den tur sirkunstansia.

Advertisement