Gezaghèber John Soliano a kondená fuertemente e insidente ku tiramentu ku a tuma lugá durante wikènt tras di lomba, i a hasi un yamada na komunidat pa no hustifiká ni normalisá ningun forma di violensia.

Den un deklarashon públiko, Soliano a bisa ku e hecho ku a usa un arma di kandela kontra propiedat di un agente polisial ta un krímen serio ku mester preokupá henter komunidat. Segun gezaghèber, loke ta igualmente alarmante ta e reakshonnan ku a sigui despues di e insidente, kaminda algun persona a hustifiká òf asta a mustra sosten pa menasa, intimidashon i violensia.

Advertisement

Soliano a ekspresá su sosten kompleto pa e mensahe emití pa KPCN, ku a deklará ku violensia i intimidashon kontra agente polisial no ta tolerá. El a enfatisá ku polis i otro trahadónan enkargá ku mantené seguridat i òrden públiko mester por ehersé nan trabou sin menasa òf preshon.

“Na momentu ku esnan ku ta traha pa seguridat i òrden públiko ta bou di menasa, nos estado di derecho ta bou di menasa,” Soliano a deklará.

Gezaghèber a indiká ku e prinsipio aki no ta limitá solamente na polis, sino ku ta apliká pa tur hende den komunidat. Segun'é, desakuerdo, rabia òf kritika no por sirbi komo ekskusa pa menasa, agreshon òf otro aktonan violento.

Un punto ku Soliano a resaltá ta e peliger di trata violensia diferente segun ken ta e víktima. El a atvertí ku bagatelisá, hustifiká òf aploudí violensia kontra persona ku tin opinionnan diferente ta kontribuí na normalisashon di un fenómeno ku no mester tin lugá den ningun sirkunstansia.

Ademas, e gezaghèber a hasi un apelashon na lidernan den e komunidat pa pronunsiá nan mes klaramente kontra menasanan i agreshonnan, spesialmente esnan ku ta manifestá riba medionan sosial.

“Nos tin ku puntra nos mes si esaki ta e Boneiru kaminda nos ke biba i ku nos ke laga pa nos yunan,” Soliano a bisa.

Na final di su mensahe, gezaghèber a yama riba komunidat pa pensa promé ku reakshoná, skucha promé ku husga i sigui trata otro ku respe1t. Segun e, ningun hende mester biba ku miedu pa violensia i kambio positivo den komunidat ta kuminsá ku kada persona.