STINAPA i Kolegio Ehekutivo (KE) a palabra un paro temporal di tiramentu di kabritu den Parke Nashonal Washington Slagbaai. E medida ta sigui despues ku e tema a kousa diskushon i emoshon den komunidat durante e último simannan.

Segun STINAPA i KE, e preokupashonnan ku ta biba den pueblo ta ser tuma na serio. P’esei, durante e periodo di paro temporal, lo tin un investigashon pa wak kon por pone mas kabritu disponibel pa komunidat na lugá di tira nan.

Advertisement

A tuma e desishon durante un reunion entre representantenan di STINAPA i KE na djaluna, 15 di sèptèmber.

E medida pa tira kabritu ta forma parti di Proyekto Parke Bunita, ku tin komo meta restourá e naturalesa original di e parke. Segun e organisashon, e kantidat di kabritu den e área ta mas haltu ku loke e ekosistema por sostené, loke ta tin un efekto negativo riba vegetashon i biodiversidat.

For di 2019, mayoria di e kabritunan ku ta ser saka for di parke ta sali bibu. Ta entregá nan na partikular, instansia i organisashonnan ku por hasi uso di nan. Den praktiká, mas o ménos 75 porshento di kabritunan ta keda doná bibu, mientras ku ta tira 25 porshento komo último rekurso.

STINAPA ta indiká ku e promé resultado di e proyekto ya ta visibel. Den diferente área kaminda kabritu no tei mas, por opservá señalnan di rekuperashon natural despues di hopi aña di preshon riba medio ambiente.

Tantu STINAPA komo KE ta pidi komunidat pa duna e espasio nesesario pa por realisá e investigashon i evaluá mihó opshon pa e maneho futuro di kabritu den parke.