Miembro di Konseho Insular Daisy Coffie (M21) a presentá preguntanan formal na Gezaghèber pidiendo klaridat tokante señalnan di posibel interferensia polítiko den aparato gubernamental. E petishon ta basa riba artíkulo 172, lid 2 di Wet Openbare Lichamen BES, ku ta stipulá ku Gezaghèber mester promové integridat gubernamental di entidat públiko.

Motibu pa e preguntanan ta un karta manda pa Gezaghèber na Konseho Insular dia 10 di ougùstùs 2026, den kua el a referí na señalnan di posibel interferensia polítiko den aparato gubernamental. Segun Gezaghèber, desaroyonan di e índole aki por afektá kalidat di gobernashon i miná konfiansa di komunidat den gobièrnu.

Advertisement

Den su preguntanan, Coffie ta indiká ku influensia polítiko indebí por dañá separashon entre polítika i ehekushon. E ta enfatisá ku empleadonan públiko mester por ehersé nan trabou di manera independiente, obhetivo i den kuadro di lei. Si tin preshon pa desviá di e prinsipionan aki, esaki por representá un asunto serio di integridat.

E preguntanan dirigi na Gezaghèber ta inkluí:

1. Si ta na konosementu di señalnan konkreto di interferensia polítiko den aparato gubernamental.
2. Si e señalnan aki ta duna motibu pa ordená un investigashon di integridat pa protehá integridat gubernamental i separashon entre polítika i ehekushon.
3. Si ya tin medidanan ofisial tuma òf investigashonnan relashoná ku e alegashonnan menshoná.

Coffie a pidi un reakshon formal di Gezaghèber mas pronto ku ta posibel.

Segun Diasy Coffie, e asuntu aki ta toka prinsipionan fundamental di bon gobernashon, manera integridat, transparensia i independensia di aparato gubernamental.