Eskudo di Boneiru ta keda presentá den un vershon adaptá riba algun rotònde di Boneiru, kaminda e diseño visual ta mustra diferensia ku e eskudo original ku a keda aprobá na 1986. E koló oro i algun di e rantnan pretu ku ta forma parti di e diseño original no ta visibel den e mesun forma. Un otro diseño totalmente adaptá di e eskudo di Boneiru tambe a sali na públiko, kaminda diferente elemento di e eskudo original a wòrdu kambiá i rediseñá. E vershon nobo ta mustra un imágen diferente di e símbolo ku a wòrdu aprobá ofisialmente na 1986, loke ta lanta pregunta tokante ken a aprobá e diseño, kua ta e propósito di e adaptashon i si e ta un símbolo ofisial òf simplemente un vershon gráfiko.

E komishon a presentá tres proposishon pa e eskudo: flamingo, pasobra Boneiru ta mundialmente konosí komo isla di flamingo; un strea di sinku punta, komo símbolo di e sinku islanan di e antaño Antias Hulandes; i e yatu largu karakterístiko na Boneiru.

Sinembargo, e diseño final mester a kumpli ku e reglanan di heráldika i mester a haña aprobashon di Hoge Raad van Adel na Hulanda. E eksperto den heráldika, mr. P.C. Briët, a asistí den adaptá e diseño segun normanan heráldiko. E resultado tabata e eskudo ku nos konosé awe: un korona oro riba un eskudo blou i plata ku un timon oro, un strea kòrá i un ring di kompas pretu.

Dia 6 di sèptèmber 1986, e eskudo di Boneiru a keda revelá ofisialmente durante un seremonia ku a konta ku presensia di miembronan di Staten di Antias Hulandes i promé minister di e tempu, Don Martina. Durante su diskurso, e gezaghèber di e tempu, George Soliana, a deskribí e eskudo komo un refleho di karakter boneriano: “un ser humano balioso ku despues di un lucha duru a sa di logra su meta”.

Nifikashon di símbolonan

Segun e deskripshon ofisial, e eskudo ta konsistí di un eskudo blou ku un timon oro. Mei mei tin un eskudo chikí plata ku un strea di seis punta den kòrá, rondiá pa un ring di kompas pretu. Riba e eskudo tin un korona oro ku sinku blachi.

E eskudo blou ta representá e shelu i e laman ku ta konektá Boneiru ku restu di mundu. E timon oro ta simbolisá tradishon marítimo di nos pueblo. E strea kòrá ta representá e lucha i perseveransia di bonerianonan, mientras ku su seis punta ta referí na Rincon, Nort di Saliña, Antriol, Nikiboko, Tera Kòrá i Playa. E ring di kompas simbolisá rumbo fihó i relashon ku Boneiru tin ku diferente parti di mundu. E korona oro ta reflehá e relashon históriko ku Reino Hulandes.

Heraldika ta e siensia ku ta trata ku eskudonan i símbolonan ofisial. E kolonan usá den eskudo di Boneiru ta e kolo heráldiko tradishonal: oro, plata (blanku), azur (blou), keel (kòrá) i sabel (pretu).

Komo parti di Reino Hulandes, Boneiru tin derecho di usa un korona markesal den su eskudo. Hoge Raad van Adel ta e institushon ku ta evaluá i kontrolá si eskudonan ofisial ta kumpli ku normanan heráldiko. E eskudo di Boneiru a haña aprobashon di e konseho aki na 1986.

Ora Antias Hulandes a wòrdu disolvé dia 10 di òktober 2010, Boneiru a mantené su eskudo. Regulashon original di 1986 a keda na vigor pa Openbaar Lichaam Bonaire despues di e transishon konstitushonal.

Uso di Eskudo

E eskudo di Boneiru ta e símbolo ofisial di e Openbaar Lichaam Bonaire. Generalmente, e ta wòrdu usá riba dokumentonan ofisial, publikashonnan gubernamental, edifisionan di gobièrnu, sertifikado, komunikashon institushonal i otro ekspreshonnan ofisial di e outoridatnan lokal.

E desishon di 26 di yüni 1986 ta definí kon e eskudo mester ta i ta inkluí un ilustrashon ofisial di e símbolo. Sinembargo, e regulashon no ta kontené regla eksplísito tokante uso komersial, pèrmit pa terseronan òf sankshonnan pa uso no autorisá. Pa e motibu ei, organisashon, negoshi òf partikularnan ku kier usa e eskudo den publikashon, produkto òf material promoshonal, por tuma kontakto ku Openbaar Lichaam Bonaire promé pa verifiká si tin maneho òf prosedimentonan aplikabel.

Vershon modifiká riba rotòndenan i invitashon pa dia di Boneiru

A surgi atenshon pa e manera ku e eskudo di Boneiru ta keda representá den diferente espasio públiko. Riba rotònde na Boneiru, e eskudo ta presentá den un forma ku ta diferensiá di e diseño original ku a keda aprobá na 1986. Ademas, un di dos kaso riba un invitashon pa dia di  Boneiru ta mustra un diseño ku ta parse ainda mas diferente, kaminda diferente elemento di e eskudo original a wòrdu adapta òf kambiá.

Entre e diferensianan ku por wòrdu opservá den e vershonnan riba rotònde tin uso mas limitá òf ousente di e kolo oro i un simplifikashon di algun di e rantnan i kontournan pretu ku ta forma parti di e diseño original. E diseño riba e invitashon ta parse ainda mas leu for di e eskudo original, ku diferente elemento ku a keda rediseñá, loke ta hasi ku e vershon aki parse mas komo un reinterpretashon di e eskudo ku adaptashon grafiko.

E situashon ta lanta pregunta tokante e estatus di e diferente vershon. Ta trata aki di adaptashonnan gráfiko pa diferente propósito i superfisie, òf tin un kambio ofisial den e representashon visual di e eskudo di Boneiru? Pa por konsiderá ku e eskudo mes a keda modifiká, lo mester tin un desishon formal ku ta sostené tal kambio.

E desishon di 26 di yüni 1986 ta kontené deskripshon ofisial di e eskudo i un ilustrashon ku ta forma parti di e dokumento. Den e deskripshon ta menshoná, entre otro, e timon oro, e strea kòrá, e ring di kompas pretu i e korona oro.

Esaki a krea dikushonnan legitimo den komunidat tokante: Ken a aprobá e adaptashonnan? Ken i ki dia a aprobá esakinan? Tin un manual di identidat visual òf regla ofisial ku ta permití diferente vershon di e eskudo? I kua di e vershonnan ku ta wòrdu usá awe ta e eskudo ofisial di Boneiru?

E pregunta aki ta bira ainda mas relevante pasobra e eskudo no ta simplemente un logo. E ta un símbolo ofisial ku ta representá historia, identidat i pueblo di Boneiru.

Advertisement