Selibon lo haña kuater trùk di sushi nobo den periodo binidero komo parti di esfuerso pa mehorá sistema di rekohementu di sushi na Boneiru. A bestèl e vehikulonan kaba i segun espektativa nan lo keda entregá na fin di luna di òktober 2026.

Segun Entidat Públiko Boneiru, e trùknan nobo ta forma parti di diferente medida pa mehorá operashon di Selibon i atendé e retonan den rekohementu i prosesamentu di sushi. Den luna di febrüari ya kaba a kumpra dos trùk pa yuda mehorá kapasidat di rekohementu. Tambe a invertí den piesanan di reserva, mantenshon i otro ekipo nesesario pa sostené e flota di vehíkulonan.

Advertisement

Ademas di e trùknan di sushi, a invertí den ekipo pisá, inkluyendo un "wheel loader", un dòmtrùk, un "landfill compactor" i un katapila. E "wheel loader" ya tei, mientras ku e otro mashinnan ta sperá pa yega den luna di òktober.

Segun informashon, a destiná fondo pa limpiesa di almasenamentu di tayer, mehorashon di sistema di trabou na lèntfel Lagun i pa fortalesé posishon finansiero i operashonal di Selibon.

Aktualmente un investigashon ta kore pa determiná kua lo ta e mihó lokashon pa un sentro nobo di transbordo i separashon multifunshonal. E proyekto ta forma parti di planifikashon pa logra un sistema di maneho di sushi mas struktural i duradero pa Boneiru.

Medidanan tumá te awor a kontribuí na redukshon di molèster den area rondó di lèntfel Lagun, manera riesgo di kandela, plaga i holó stinki.