Futuro di Landhuis Karpata a drenta den un fase nobo. Miéntras ku Konseho Insular a hasi un yamada na Kòlègio Ehekutivo pa finalisá ku urgensia transferensia di erfpacht di e monumento na Stichting Cocari II, Mi Baranca B.V. a entregá un oposishon formal (bezwaar) kontra e intenshon di otorgá e erfpacht aki.

E diskushon ta rondó di pèrdida di un finansiamentu pa restourashon di USD 900.000 na Stichting Cocari II, ku a keda reservá pa Nationaal Restauratiefonds pa restaurá e monumento protehá. E finansiamentu aki a keda anulá riba 21 di mei 2026 despues ku e transferensia di erfpacht, ku tabata un kondishon pa e finansiamentu, no a wòrdu finalisá despues di kuater aña.

Konseho Insular ta pidi akshon rápido

Den un moshon tratá riba 29 di yüni 2026, Konseho Insular a konstatá ku Openbaar Lichaam Bonaire i Stichting Cocari II a sera un konbenio na febrüari 2022 pa preservashon, restourashon i maneho sostenibel di Landhuis Karpata. Ademas, riba 25 di òktober 2022 Kòlègio Ehekutivo a tuma e desishon pa duna aproksimadamente 22.813 meter kuadrá di tereno na erfpacht na e fundashon.

Segun Konseho Insular, e monumento ta den un estado avansá di deteriorashon i mas retraso por kousa daño ku no por keda rekuperá. Den e moshon, Konseho Insular ta rekordá ku Openbaar Lichaam Bonaire, komo doño di e monumento protehá, tin obligashon segun Monumentenverordening Bonaire pa mantené i konserv’é.

Konseho Insular a pidi e Kòlègio Ehekutivo, entre otro, pa finalisá e transferensia di erfpacht den un luna, investigá posibilidatnan pa salba òf reaktivá e finansiamentu pèrdí, i tuma medida pa evitá mas deteriorashon di e monumento. E moshon a keda aseptá unanímamente pa 7 miembro presente ku tabata Salma Serberie, Cyrill Vrolijk, Daniel Crestiaan, Simeona Chirino-Felida, Benito Dirksz i James Kroon.

Mi Baranca ta alegá un trayekto di mas ku dies aña

Un dia despues, riba 30 di yüni 2026, Mi Baranca B.V. a entregá un oposishon formal na Kòlègio Ehekutivo i Konseho Insular.

Segun direktor Ing. Angelo Clarinda, e kompania ta trahando ku Openbaar Lichaam Bonaire for di 2012 riba un proyekto turístiko ekológiko rondó di Landhuis Karpata, konosí komo “Karpata Dive Inn Resort”. Mi Baranca a indiká ku entre 2012 i 2018 a entregá i presentá varios plan di proyekto, business plan i petishonnan pa erfpacht na gobernantenan i funshonarionan di OLB.

Den e oposishon, Mi Baranca ta deklará ku nunka a risibí un komunikashon formal indikando ku su petishon a wordu rechasá òf ku e dosier a wordu será.

Ademas, e kompania ta sostené ku na 2014, diputado James Kroon a informá ku e proyekto lo keda otorgá direktamente na Mi Baranca. Segun e Kòlègio Ehekutivo e propuesta tabata e opshon ku mihó a enkahá, ku bista riba desaroyo sostenibel pa e área i medio ambiente.

Segun Mi Baranca, e kompromiso aki posteriormente a keda konfirmá den korespondensia ku Direktorado di Desaroyo i Maneho Territorial (R&O), pero un desishon definitivo nunka a sigui.

Apelashon riba prinsipionan di bon gobernashon

Den Mi Baranca su karta di oposishon, Nan ta argumentá ku e intenshon di otorgá e erfpacht na Stichting Cocari II ta bai kontra varios prinsipio general di bon gobernashon.

E kompania ta hasi apelashon riba:

• prinsipio di diligensia den toma di desishon, pasobra Mi Baranca no a wòrdu skuchá promé;
• prinsipio di konfiansa, debí na promesanan hasí na 2014;
• prinsipio di igualdat di oportunidat, pasobra anteriormente tabatin plan pa un prosedura públiko di selekshon, miéntras ku awor ta parse ku ta otrorgámentu ta keda direktamente konsiderá na un tersero;
• prinsipio di motivashon, pasobra segun Mi Baranca nunka a splika pakiko su petishon no a risibí siguímentu.

Mi Baranca a pidi Kòlègio Ehekutivo pa suspendé temporalmente e proseso di toma di desishon tokante e erfpacht, pone tur dokumentonan relevante disponibel i duna e kompania oportunidat pa presentá su plan i punto di bista na Kòlègio Ehekutivo i/o Konseho Insular.

Benito Dirksz: E moshon tin komo meta pa salba Landhuis Karpata

Den un entrevista ku Konsehal Benito Dirksz redakshon di Energia TV a risibí e oportunidat pa hasi diferente pregunta. Dirksz a indiká ku e moshon aprobá den Konseho Insular no tabata pa skohe Stichting Cocari II, sino pa garantisá ku Landhuis Karpata ta keda restourá i manehá apropriadamente.

Segun Dirksz, for di 2022 tin un konbenio entre Openbaar Lichaam Bonaire i Stichting Cocari II pa permití ku e fundashon ta buska finansiamentu pa restourá e monumento. El a señalá ku e fundashon a logra un finansiamentu di USD 900.000 pa restourashon, pero ku e proyekto a retrasá.

Dirksz a bisa ku e moshon ta un ekspreshon di deseo di Konseho Insular pa evitá ku e monumento ta sigui deteriorá, i pa logra ku e sitio ta wòrdu restourá, mantené i eksplotá na benefisio di komunidat.

Tokante Energia Tv su pregunta pakiko no a hasi un destaho públiko, Dirksz a deklará ku e no por papia di e motibunan ku a hiba na e konbenio di 2022, pasobra e no tabata inbolukrá den e proseso na e tempu ei. El a agregá ku si otro partidonan tin interes i por presentá un plan sólido, gobièrnu por evaluá esaki.

Riba pregunta si e moshon ta kompatibel ku e prinsipionan di e Didam-arrest, Dirksz a bisa ku un moshon no ta un desishon definitivo, sino un deseo polítiko. Segun e, den e proseso formal mester tuma na kuenta e normanan di e Didam-arrest òf konsiderá interes di otro partidonan, esaki por sosodé den siguiente fase di e proseso.

Advertisement