1430 kantidat di morto konfirmá na Venezuela despues di temblor

Naturalesa i Medio Ambiente

1430 kantidat di morto konfirmá na Venezuela despues di temblor

Pa AC 27 Jun, 2026 5 Min Lesa 86 Bishitante

Kantidat di persona ku a perde nan bida despues di dos temblor devastador ku a dal Venezuela riba 24 di yüni a subi 1.400, segun informashon ofisial publiká riba djasabra 27 di yüni.

Operashonnan di reskate ta sigui den e áreanan mas afektá, mientras ekiponan internashonal ta yega e pais pa yuda den trabounan di buskeda.

Presidente di Asamblea Nashonal, Jorge Rodríguez, a informá ku e kantidat ofisial di morto a yega 1.430 persona. Miles di otro persona a resultá heridá, mientras ku famianan afektá a keda trasladá pa sentronan di refùgio temporal.

Mas ku 1.600 reskatista internashonal a yega na Venezuela abordo di 17 buelo diferente. E ekiponan ta asistí den operashonnan di emergensia, spesialmente den estado na kosta di La Guaira, unda e daño ta konsiderabel. Den algun komunidat, residente i boluntario ta sigui saka personanan na bida i viktimanan for di bou di materialnan ku a kai den otro. Outoridatnan ta indiká ku miles di persona a desaparesé, tin mas o menos 55.000 nòmber di persona ku ainda no a keda lokalisá.

E dos temblor fuerte di magnitut 7.2 i 7.5 a keda sigui pa varios aftershock, ku ainda ta wordu sintí den diferente parti di Venezuela. Outoridatnan ta sigui monitoriá e aktividat sísmiko, loke ta komplika e trabou di reskate den edifisionan ku a basha den otro.

Pa fasilitá operashonnan di emergensia, gobièrnu a limitá akseso na algun área di La Guaira i na e kaminda prinsipal entre Caracas i La Guaira. Solamente personanan ku kredensial ofisial ta permití pasa e punto di kontrolnan.

Na mes momento, servisio di koriente elektriko ta keda restablesé poko poko. Segun outoridatnan, alrededor di 60 porshento di suministro elektriko a wordu restablesé despues di e desaster.

Diferente pais i organisashonnan internashonal a ekspresá nan solidaridat ku Venezuela. Gezaghèber John Soliano, na nòmber di Entidat Públiko Boneiru (EPB), a ekspresá solidaridat ku e pueblo di Venezuela despues di e temblor. Soliano a enfatisá riba e laso estrecho entre Boneiru i Venezuela, i a señalá ku hopi habitante di Boneiru ta biba den insiguridat tokante nan famia i amistatnan na e pais.

EPB ta den kontakto ku Ministerio di Relashon Eksterior i ta sigui e situashon di aserka. Mientrastantu, EPB i Telbo N.V. a anunsiá ku yamadanan pa Venezuela ta gratis temporalmente for di 26 di yüni te 6 di yüli 2026 pa sostené komunikashon entre famianan.