Representantenan di e entidatnan públiko di Boneiru, Sint Eustatius i Saba, huntu ku representantenan di Texel, Vlieland, Terschelling, Ameland i Schiermonnikoog, a reuni na Texel dia 1 i 2 di òktober pa un programa di trabou den kuadro di Kolaborashon E8.

E8 ta e plataforma di kolaborashon di e ocho islanan hulandes. E islanan ta reuni pa interkambiá konosementu i trata tópikonan ku ta relashoná ku gobernashon i maneho insular.

Advertisement

E programa a kuminsá na terminal di fèri TESO na Den Helder, kaminda Komisario di Rei di Noord-Holland Arthur van Dijk a risibí e delegashonnan. Na Texel, burgemeester Mark Pol a risibí e partisipantenan.

Durante e promé dia, e delegashonnan a bishitá De Zoete Toekomst, un proyekto pa almasenamentu di awa dushi pa agrikultura. E partisipantenan a haña informashon tokante maneho di awa dushi na un isla.

Despues, un seshon tokante integridat i bon gobernashon insular a tuma lugá bou di guia di Arthur van Dijk. E partisipantenan a interkambiá eksperensia tokante resiliensia atministrativo, destabilisashon, elekshonnan transparente i konfiabel, i gobernashon di fundashonnan i organisashonnan semi-públiko.

Gezaghèber di Saba Jocelyn Levenstone a tene un presentashon tokante elekshon di 2027 i e uso di votamentu ku vòlmagt.

Gezaghèber di Boneiru John Soliano a tene un presentashon tokante bon gobernashon di organisashonnan di gobièrnu i organisashonnan semi-públiko. El a trata e ambiente den kua e organisashonnan ta opera, e ròl di gobièrnu komo akshonista i e diferente ròl i responsabilidatnan den e organisashonnan.

Dia 2 di òktober, e partisipantenan a bishitá De Slufter den un ekskurshon organisá ku Vogelinformatiecentrum Texel i Staatsbosbeheer. E ekskurshon tabata enfoká riba maneho di naturalesa i protekshon di áreanan vulnerabel di kosta.

Despues, E8 a reuni ku miembronan di Tweede Kamer, inkluso miembronan di e komishonnan pa Infrastruktura i Maneho di Awa i pa Relashonnan den Reino.

Gezaghèber di Sint Eustatius Alida Francis a presentá tres prioridatnan di E8: invershon igual, fortalesimentu di kapasidat di ehekushon lokal i mas akshon kontra kambio di klima.

Francis a papia tambe tokante desafionan ku gobièrnunan di islanan chikitu ta enfrenta, inkluso personal limitá i akseso na ekspertisio spesialisá. Tokante kambio di klima, el a yama pa mas atenshon pa ehekushon di maneho.

Burgemeester di Schiermonnikoog Henri Meendering a papia tokante siguridat di awa i e ròl di sistemanan natural, manera kwelder, den protekshon di kosta. E diskushon a inkluí tambe e ròl di refnan di koral den área karibense i medidanan di protekshon di kosta na Waddeneilanden.

E programa a sera ku un bishita na De Schorren, bou di guia di Natuurmonumenten. Despues, e partisipantenan a bandoná Texel pa biaha pa Den Helder.