Den oranan di atardi di djamars 2 di yüni, polis a tene varios kòntròl di tráfiko na diferente parti di isla, resultando den 9 but i konfiskashon di un vehíkulo.

E kòntròlnan a tuma lugá na E.E.G. Bulevar, Kaya Nikiboko Sùit, Kaya Andres A. Emerenciana i Kaya Amsterdam. Durante e operashon, polis a para i kontrolá un total di 49 vehíkulo.

E 9 butnan ku a wordu imponé tabata pa diferente violashonnan di lei di tráfiko:

• 1 but pa manehá ku telefòn den man mientras ta stür;
• 4 but pa manehá sin reibeweis bálido;
• 4 but pa manehá sin seguro bálido.

Durante un di e kòntròlnan na Kaya Amsterdam, un shofùr a intenta evitá e punto di kòntròl dor di desviá su ruta. E akshon aki a lanta sospecha i un patruya a sigui e vehíkulo.

Na Kaya Aruaco, polis a duna e shofùr señal pa para, pero el a sigui kore ku velosidat haltu. Esaki a resultá den un persekushon kòrtiku ku a tèrminá na Kaya Zink.

Durante e kòntròl posterior, polis a konstata ku e shofùr tabata menor di edat i no por a presentá un seguro bálido. E menor a risibí but pa manehá sin reibeweis i sin seguro. Ademas, polis a konfiská e vehíkulo i hib’é warda na stashon di polis.

Polis a indiká ku kòntròlnan di tráfiko lo sigui tuma lugá regularmente ku meta di garantisá seguridat riba kaminda i pa respetá reglanan di tráfiko.

Advertisement