Autoriteit Consument & Markt (ACM) a ahustá tarifanan máksimo pa elektrisidat na Hulanda Karibense for di 1 di yüli 2026. Pa Boneiru, esaki ta nifiká ku un kas di famia promedio lo paga aproksimadamente USD 27 mas pa luna pa koriente debí na subida den e tarifa variabel, ku ta resultado di e oumento den preis internashonal di zeta.

Segun ACM, e tarifa máksimo pa uso variabel na Boneiru lo subi di aproksimadamente USD 0,39 pa kilowatt-ora (kWh) pa USD 0,50 pa kWh. Pa usuarionan di pagabon, e tarifa máksimo lo subi di aproksimadamente USD 0,74 pa USD 0,85 pa kWh.

Tarifa fihó ta keda supsidiá

ACM a indiká ku tarifa fihó máksimo no a kambia. Ministerio di Asuntunan Ekonómiko i Klima ta sigui supsidiá tarifa fihó durante 2026 ku e meta di mantené esaki na un nivel komparabel ku Hulanda Europeo. 

Esaki ta nifiká ku, mientras konsumidónan lo sinti e efekto di e subida den preis di energia riba e parti variabel di nan faktura, e tarifa fihó mensual ta keda parsialmente protehá dor di supsidionan gubernamental.

Water- en Energiebedrijf Bonaire (WEB) a kaba di anunsiá un redukshon importante den e tarifa fihó di elektrisidat. Danki na presupuesto adishonal disponibel pa ministerionan Hulandes, e tarifa fihó mensual pa konekshonnan te ku 3 x 35 Ampèr lo baha ku 25%, for di USD 47,80 pa USD 35,85 pa luna.

Segun WEB, e fondo adishonal a permití pa implementá un redukshon mas grandi, ku e kompania no por a apliká na kuminsamentu di aña debí na limitashonnan presupuestario.

Advertisement