Entidat Públiko Boneiru (OLB) i Ministerio di Enseñansa, Kultura i Siensia (OCW) a presentá ofisialmente Agenda di Archivo Boneiru 2026–2030. E agenda ta definí prioridatnan i akshonnan nesesario pa fortalesé infrastruktura di archivo riba Boneiru durante periodo 2026–2030.

Archivonan ta forma un parti importante di memoria institushonal i sosial. Nan ta sirbi pa sostené ehekushon di tareanan públiko, rendishon di kuenta, investigashon históriko i konservashon di herensia kultural.

Advertisement

E agenda ta basa riba e meta pa fortalesé fundeshi pa maneho, preservashon i aksesibilidat di archivonan na Boneiru. Segun e dokumento, e prioridatnan pa e próksimo aña ta enfoká riba sinku area prinsipal: lei i regulashon, proseso di informashon i archivo, personal i konosementu, infrastruktura digital, i desaroyo di un archiefbewaarplaats (depósito di archivo).

Den e area di lei i regulashon, e agenda ta pone enfoke riba implementashon di instrumento manera e Selectielijst BES, maneho di dokumento i organisashon di e servisio di archivo. Pa loke ta trata proseso di informashon i archivo, lo traha riba proseso pa registrá, warda, transferí, digitalisá i pone dokumentonan disponibel pa uso di futuro.

Un otro punto importante ta e desaroyo di infrastruktura digital. Entre e akshonnan tin fortalesementu di sistema di informashon eksistente, implementashon di sistema pa maneho digital di archivo i desaroyo di un portal digital pa hasi archivonan mas aksesibel.

Ademas, e agenda ta señalá nesesidat di realisá un archiefbewaarplaats ku ta kumpli ku e eksigensianan legal i tékniko pa preservashon duradero di dokumentonan. E fasilidat lo mester ofresé espasio pa almasenamentu, investigashon, servisio na públiko i digitalisashon.

Agenda di Archivo Boneiru 2026–2030 ta resultado di kolaborashon entre OLB, OCW i otro partnernan relevante. Durante e periodo di implementashon lo tin evaluashonnan regular pa sigui e progreso di akshonnan identifiká den e agenda.

Ku e agenda aki, Boneiru ta disponé di un strategia pa sigui traha riba mehorashon di maneho di archivo i aksesibilidat di informashon pa gobièrnu, investigadónan i komunidat.