Papiamentu
Intento ambisioso pa kibra rekòrt di fli mas grandi den islanan ABC no a logra awe durante e di 44 edishon di kontèst di fli. E fli di mas ku 50 meter di grandura, konstrukshon di Fly High Kite Team liderá pa Layo, lamentablemente no a logra subi den laira.
E tim a hasi kuater intento pa lanta e fli. Kada intento a representá un reto riba su mes, ku un operashon grandi kaminda alrededor di 17 hende tabata na e fli mes, mientras ku otro 20 hende tabata traha riba e liña pa mantené kontrol.
Durante e promé dos intento, e tim a hasi uso di un Manitou pa hala e kabuya di e fli pa yuda ku e subidá. Sin embargo, e último dos intento a konsistí di kore ku e fli pa trata di lanta esaki, pero falta di bientu sufisiente a keda un faktór desisivo ku a stroba e proseso.
Den tur okashon, e fli no a logra bai laira pa kumpli ku e eksigensianan di e reto. Apesar di e esfuersonan i preparashonnan ekstensivo, e kombinashon di reto tekniko i kondishonnan di bientu no a permití pa logra e meta.
Ku esaki, Kòrsou ta sigui mantené su rekòrt di fli mas grandi subí den laira den islanan ABC, ku un largura di 49 meter.
Kargando komentarionan...