Papiamentu
Windsurfista Boneriano Amado Vrieswijk a konkistá e título di Kampion Mundial den kategoria Speed Open di foil, durante e kompetensia ku a tuma lugá na La Palme, Fransia.
Despues di un kompetensia intenso di dies dia, Vrieswijk a demostrá su dominio total riba laman, logrando un velosidat máksimo impreshonante di 36,76 nudo riba un distansia di 500 meter. Esaki ta ekivalente na mas o ménos 68,1 kilometer pa ora, un moveshon ku ta rekerí un kòntròl i téknika eksepsional den e disiplina di speedfoiling.
E kampion nobo a kompartí su alegria riba retnan sosial, evaluando e sakrifisio tras di e triunfo akí: "Ta difísil pa deskribí kiko e sintimentu akí ta nifiká despues di tantu ora di entrenamentu, tèstmentu i trabou intensivo huntu ku e markanan pa por a hasi esaki posibel. E echo ku tur e esfuerso a duna fruta ta hasi e título akí mas spesial ainda", Amado a deklará.
Ku e viktoria akí den e kampionato di ISWC - International Speed Windsurfing, Amado Vrieswijk ta bolbe pone nòmber di Boneiru na haltu den e tòp di deporte akuátiko mundial. Su velosidat i determinashon a pon’é un biaha mas komo e mihó den su área.
Kargando komentarionan...