Animal Shelter Bonaire ta buska boluntario i miembro nobo pa direktiva

Lokal

Animal Shelter Bonaire ta buska boluntario i miembro nobo pa direktiva

Pa AC 03 Oct, 2026 5 Min Lesa 52 Bishitante

Animal Shelter Bonaire ta pone atenshon riba Dia Mundial di Animal, ku ta ser selebrá awe, riba 4 di òktober, pa komuniká riba e oportunidat pa boluntariado den su organisashon i pa buska miembro nobo pa su hunta di direktiva.

E organisashon ta buska personanan interesá pa yuda den diferente area di su operashonnan, inkluyendo asilo di animalnan, marshe di kosnan di segunda mano (Pakus di Pruga) i stènt na Marshe di Krusero.

Na e asilo, tin mester di boluntario pa asistí ku tareanan manera limpia kouchi, kuida animalnan i duna nan atenshon diario. Animal Shelter Bonaire ta indiká ku no tin mester di eksperensia previo pa partisipá.

E organisashon ta buska tambe yudansa na Pakus di Pruga, kaminda boluntarionan por asistí ku harma i desarmá e marshe, klasifiká donashonnan i atende bishitantenan. E entrada di e aktividat ta destiná pa sostené kuido di animalnan den e asilo.

Ku e temporada di krusero aserkando, Animal Shelter Bonaire ta amplia su buskeda pa boluntarionan pa stènt ku e organisashon ta operá na e Marshe di Krusero. E trabou ta inkluí harma i desarmá e stènt i asistí ku bentanan durante dia na yegada di barkunan.

Ademas, e fundashon ta buska kandidatonan pa forma parti di su hunta di direktiva. Segun e komunikado, e direktiva ta responsabel pa e maneho general di e asilo, Pakus di Pruga i e aktividatnan relashoná ku e Marshe di Krusero.

Personanan interesá den boluntariado por haña mas informashon tokante e oportunidatnan disponibel na website di Animal Shelter Bonaire. Kandidatonan ku kier postulá pa un puesto den e hunta di direktiva por manda un presentashon kortiku, motivashon i deskripshon di e eksperensia ku nan por aportá na e organisashon.

Dia Mundial di Animal ta ser observá mundialmente riba 4 di òktober pa pone enfoke riba bienestar di animalnan i e rol ku organisashonnan i komunidatnan ta hunga den nan kuido.