Djárason 22 di aprel, e apertura ofisial di e stashon di satélite Galileo a tuma lugá na Boneiru. E stashon aki ta forma parti di e sistema di satélite di Union Europeo (EU) i ta hunga un ròl krusial den e desplege di teknologia di nabegashon den área di Karibe.

Pa marka e okashon aki, a organisá un konferensia na Van der Valk Plaza Resort kaminda a elaborá riba e diferente funshonnan ku e sistema Galileo tin pa e region. E satélitenan aki no ta sirbi solamente pa nabegashon general, sino tambe pa tareanan spesífiko manera "search-and-rescue" (buskeda i reskate), investigashon di klima i detekshon di sargassum.

E mainta a start ku e apertura di e konferensia kaminda a duna bon biní na e invitadonan i a splika e importansia stratégiko di e stashon na Boneiru. Alrededor di 10’or di mainta, tabatin un enkuentro kòrtiku ku prensa kaminda a duna mas detaye riba e proyekto.

E sistema Galileo ta sistema di satélite propio di Europa ku ta ofresé informashon di posishon i tempu masha presis. Pa Boneiru, e stashon aki ta nifiká un adelanto den teknologia i kooperashon internashonal. E kapasidat pa detektá sargassum i monitoria kambio di klima ta áreanan di gran importansia pa e preservashon di naturalesa i seguridat marítimo entre e islanan.

Ku e apertura di e stashon aki, Boneiru ta keda fihá riba e mapa internashonal di infrastruktura di satélite, loke ta sirbi pa un mihó bista riba e área di Karibe pa tantu seguridat komo siensia.

Advertisement