Papiamentu
Ethuriel Nicolaas, representando RC Bonaire Raceway, lo biaha djaluna 20 di aprel pa San Diego, California. E koredó lo partisipá den e evento di outo "Remote Control" (RC) titulá “War of the Worlds” (WW1), ku lo ta tuma lugá na Robinson RC Raceway.
E kompetensia, ku ta enfoká riba e kategoria di 1/5 scale offroad, lo ta entre 24 i 26 di aprel. Nicolaas tin un programa intenso su dilanti, kaminda e lo kompetí den kuater kategoria diferente: Buggy 4x4, Buggy 40+, 2WD, i Electric 4x4.
E pista di Robinson RC Raceway na Potrero ta konosí pa su diseño eksigente. Pa e edishon aki, e pista a risibí preparashonnan spesial ku lo pone e téknika di koredónan i rendimentu di e outonan na prueba. Esaki ta un oportunidat pa Ethuriel Nicolaas midi nivel kontra koredónan di taya mundial den e deporte.
Partisipashon di Ethuriel ta posibel pa medio di e kooperashon entre e koredó, RC Bonaire Raceway, i e sosten di diverso sponsor i instansianan.
Despues di e dianan di kompetensia na California, ta spera e koredó bèk na Boneiru dia 29 di aprel próksimo.
Kargando komentarionan...