Boneiru a reafirmá su ròl aktivo riba esenario internashonal ku su partisipashon den e di 21 Foro di e Paisnan i Teritorionan Ultramar ku Union Oropeo (OCT–EU Forum), ku a tuma lugá na Aruba for di 9 te ku 14 di aprel 2026.

Durante e foro, Boneiru, huntu ku 12 otro Pais i Teritorio Ultramar, a firma un Deklarashon Konhunto ku ta definí e direkshon pa kolaborashon ku Union Oropeo pa e periodo di 2028–2034. E akuerdo akí ta un paso importante pa fortalesé relashonnan i posishoná Boneiru mihó pa oportunidatnan den futuro.

Na nòmber di Boneiru, gezaghèber John Soliano a partisipá na e kongreso ministerial, kaminda tur 13 miembro di e Asosiashon di Paisnan i Teritorionan Ultramar (OCTA) a uni pa firma e deklarashon.

Pa Boneiru, e Deklarashon Konhunto tin gran balor. E ta pone enfasis riba e retonan ku nos isla ta enfrentá, manera kambio di klima, limitashonnan ekonómiko i nos posishon geográfiko. Na mes momentu, Boneiru ta insistí riba e nesesidat pa solushonnan fleksibel ku ta adaptá na realidat lokal.

Boneiru a ekspresá su apresio pa e oumento proponé den presupuesto di Union Oropeo pa e Paisnan i Teritorionan Ultramar. Tambe a suprayá ku fleksibilidat den ehekushon di proyektonan i den proseso di responsabilisashon ta esensial pa logra resultadonan konkreto pa e komunidat.

Durante e periodo binidero, Boneiru lo benefisiá di enfoke riba diesun tema prinsipal pa finansiamentu i desaroyo. Entre esakinan tin resiliensia kontra klima, desaroyo di un ekonomia sostenibel, transishon digital, mihó konektividat marítimo, siguridat sosial i fortalesementu di bon gobernashon.

Ku e Deklarashon Konhunto, Boneiru ta mustra su kompromiso pa sigui traha huntu ku Union Oropeo i otro partnernan internashonal. E paso akí ta kontribuí na desaroyo sostenibel di nos isla i na kreashon di balor pa tur habitantenan di Boneiru.

Advertisement