Ekipo U10 di Boneiru a skirbi un página den historia di beisbòl hubenil. Den un final emoshonante i pèrtá, e selekshon di Boneiru a derotá Venezuela ku un skor di 2-1, konsagrando su mes komo kampion invikto di e Torneo Pony Caribbean Zone (Mustang 10U).

E partido ku a tuma lugá na Jossy Boekhoudt Ballpark tabata bon bishitá i yen di emoshon di parti fanátiko i famianan ku a bin yená tribunan pa duna e máksimo sosten na e timnan. E partido tabata un fòrsa defensivo for di e promé entrada. Ambos ekipo a mustra un nivel haltu di táktika i un picheo ku a mantené e batidónan formalmente dominá.

Venezuela a pika dilanti den di kuater entrada di e wega, tumando un bentaha mínimo di 1-0. Aunke e preshon tabata haltu, Boneiru no a pèrdè kabes. Ku un determinashon defensivo espektakular, e tim lokal a frena e atakenan di e Venezolandonan i a fòrsa nan regreso den e partido.

E pichernan di relevo a sera e porta formalmente den e último entrada, logrando e último out ku a duna inisio na un selebrashon inmenso riba tereno. Den e di 6 i ultimo entrada di e enkuentro Boneiru a bini ku un ofensiva oportuno na momento krusial. Ku koredónan na base, a konektá un hit pa empatá e partido 1-1.  Seguidamente den e mes un entrada ku koredó na tersera base Boneiru ta konektá un hit den short stop pa empuha e kareda di viktoria i laga Venezuela den tereno.

Ku e viktoria aki, Boneiru no solamente ta keda ku e kopa di kampion na kas, sino ku e ta konkistá e boleto pa representá henter region di Karibe den e próksimo Mundial di Pony U10 (Mustang World Series) ku lo tuma lugá na Merka den luna di yüli.

Pueblo di Boneiru ta selebrá e triunfo históriko aki di nos kampionnan regional! Pabien na e hungadónan, e kuerpo tékniko i e direktiva ku e logro aki.

Advertisement