Ekspertonan di tempu i organisashonnan internashonal manera WMO (World Meteorological Organization) a lanta un señal di alerta kòrá pa e region di Karibe. E fenómeno konosí komo "Super El Niño" ta birando visiblemente fuerte den área di Pasífiko, i su efektonan ya ta wòrdu sintí den nos region ku un bahada drástiko den pronóstiko di awa seru.

Segun e último datonan di mei 2026, El Niño ta kousando un oumento di temperatura den laman i un kambio den e patronchi di bientu, loke ta stroba formashon di nubianan di awa seru den Karibe.

E asina yamá "Super El Niño" no solamente ta nifiká mas kalor, sino tambe un periodo prolongá di sekura. Pa Boneiru, esaki ta trese algun desafio grandi manera Skarsedat di Awa. Ku ménos áwaseru, e reservanan di awa dushi ta baha. Tambe lo bai tin un preshon riba Agrikultura. Kunukeronan ta esnan ku mas lo keda afektá, ya ku e tera ta bira sumamente seku, loke ta hasi kultivashon di produktonan lokal difísil. Por ultimo tambe lo tin Riesgo di Kandela. E sekura ekstremo ta oumentá e chèns riba kandelanan di mondi ku por plama rápidamente debí na e bientu i falta di humedat.

Aunke El Niño ta trese sekura i kalor, e tin un efekto "positivo" den un solo aspekto ku e ta stroba formashon di orkannan den Atlántiko. Bientunan fuerte den e partinan mas altu di atmósfera ta kòrta e tormentanan promé ku nan por bira masha fuerte. Sin embargo, meteorólogonan ta spièrta pa no baha guardia.

Durante e periodo aki ta konsehá pa bebe hopi awa, protehá bo mes kontra kalor i ta Kouteloso ku kandela

E fenómeno di El Niño aki ta wòrdu spera ku lo keda dominante durante gran parti di e restu di aña 2026, hasiendo esaki un di e periodonan mas seku den último dékadanan pa nos region.

Advertisement