Djaluna 13 di aprel, Stichting Sanering Bopec Percelen a kuminsá ku un proyekto importante na Boneiru, esta pa deshasí di un tipo di skuma di paga kandela ku ta
peligroso pa hende i naturalesa. Segun e plan di ehekushon, e proyekto aki lo dura te mas o ménos fin di mei 2026, ora ku tur e material yega Alemania pa tratamentu.

Den pasado tabata usa e skuma aki pa paga kandela, spesialmente kandela grandi di zeta. Aunke e meta di e skuma ta efektivo, e ta kontené un supstansia yamá “PFAS”. E supstansia aki no ta disolve fasil i ta dañino pa salú di hende i naturalesa. P’esei, e uso di skuma pa kombati kandela ku ta kontené “PFAS” ta prohibí aktualmente. Komo ku e supstansia “PFAS” ta peligroso, ta usa e mesun téknikanan di protekshon personal ku ta usa pa paketá asbèst, ora di paketá e material aki. Di e forma aki ta sigurá ku e material ta ser tratá na un manera responsabel i no ta forma peliger pa hende ni medio ambiente.

Stichting Sanering Bopec Percelen lo tin mas di e tipo di proyektonan aki den futuro, manera limpiesa di e terenonan ku tabata anteriormente di BOPEC i aktualmente ta pertenesé na Curoil Bonaire Energy Terminal (CBET), dor di saka e teranan ku ta kontaminá ku “PFAS”. Esaki ta e promé limpiesa di “PFAS” den henter Karibe i spesialmente na islanan BES. Boneiru por ta orguyoso di su desishon i ròl pionero den esaki.

Advertisement