Tourism Corporation Bonaire (TCB) a duna lus bèrdè pa un evento kulinario nobo ku ta primintí di bira un éksito rotundo riba nos isla. Dia 6 di yüni 2026, Isidel Beach Park lo bira e esenario pa e promé Bonaire Food Truck Festival, un inisiativa ku ta rindi homenage na nos kultura stimá di trùk’i pan.

E proyekto aki ta resultado di un kooperashon stratégiko entre TCB i e empresa lokal D’Su B.V., dirigí pa Sulainie Martis, ku e meta pa fortifiká e demanda di eventonan na Boneiru i duna un plataforma na nos talentoso empresarionan kulinario.

E festival lo no ta solamente un lugá pa kome, sino un eksperensia kompleto kaminda e ambiente di playa ta meskla ku e holó i sabornan di nos ‘streetfood’ outéntiko.

Mas ku dies trùk’i pan lo tei presente pa ofresé platonan klásiko i nostálgiko te ku kreashonnan nobo i inovativo ku ingredientenan lokal.

E evento ta fungi komo un motor pa e doñonan di trùk’i pan por inová nan menú i oumentá nan popularidat tantu serka lokalnan komo turistanan.

Ambiente ta start for di 6:30 di atardi te ku 1or di mardugá na Isidel Beach Park ku lo ta vibrando ku músika, energia komunitario i, por supuesto, e mihó kumindanan

Elesiër Angel, direktor di TCB, a enfatisá ku e festival aki ta parti di un vishon mas amplio pa resaltá e outentisidat di Boneiru. Mas aleu Elesiër Angel a indika ku TCB ta invertí konsientemente den eksperensianan ku ta reflehá ken nos ta komo isla i ku di e manera aki por duna espasio na empresarionan lokal pa krese.

Advertisement