Brandaris Café a organisá un selebrashon spesial djaweps último pa rindi homenage i duna rekonosementu na hóbennan di Pony League ku resientemente a titulá kampion den e torneo Pre-Mundial Mustang 10U Caribbean Zone.

Personal di Brandaris Café a bini huntu ku e atletanan, nan entrenadónan i famianan pa selebrá e triunfo importante aki. E homenage aki ta un rekonosementu formal pa e esfuerso, disiplina i gran dedikashon ku e tim a bini ta demostrá for di momento ku nan a inisiá nan trayektoria deportivo na aña 2023. Anny Castillo, na nòmber di Brandaris Café, a enfatisá e importansia di sostené hóbennan den nan desaroyo i a felisitá nan pa e logro ku ta alsa nòmber di nos isla den eksterior.

Pa permití ku bishitantenan i komunidat en general por sigui e trayekto i apresiá e kresementu di e kampionnan aki, Brandaris Café a lansa un inisiativa adishonal i hopi spesial. Nan a krea un vitrina di ekshibishon den e café, kaminda ta dokumentá henter e progreso i evolushon deportivo di e muchanan.

E vitrina aki ta kontené un bista detayá di e trayektoria di e hungadónan, for di tempu ku nan tabata militá den kategoria di U8 te ku nan transishon i éksito aktual den kategoria U10. Di e forma aki, por visualisá i duna balor na añanan di training i pashon ku e grupo di hóben aki tin pa e deporte di beisbòl.

Advertisement