CBS Hulanda Karibense ta informá komunidat ku un mensahe falsu ta sirkulá aktualmente riba diferente plataforma di medionan sosial. E mensahe ta atvertí tokante individuonan ku supuestamente ta hasi komo empleado di un instansia estadístiko pa rekohé dato personal, potrèt òf dato biométriko durante bishita na kas.

Segun CBS Hulanda Karibense, te asina leu ku nan ta na altura, no tin ningun prueba ku e tipo di individuonan ei ta operashonal na Boneiru. E organisashon ta indiká ku e mensahe no ta nobo i ku e mesun teksto a sirkulá anteriormente na diferente pais i region di Karibe, kaminda e kontenido a wòrdu adaptá na e situashon lokal.

Kon enkuestanan di CBS ta tuma lugá

CBS Hulanda Karibense ta ehersé regularmente enkuestanan estadístiko entre famia i negoshinan. Hende ku keda selektá pa partisipá den un investigashon ta risibí un invitashon òf anunsio ofisial via karta promé ku kontakto tuma lugá. Ademas, trahadónan di CBS por tuma kontakto ku residente nan via telefòn òf durante un bishita na kas. Segun e organisashon, tur empleadonan ta karga un identifikashon ofisial ku nòmber i potrèt, ku ta keda mustrá na momento di kontakto.

CBS ta enfatisá ku su empleadonan nunka ta pidi dato biométriko manera fingerprint, ni nan no ta saka potrèt di persona òf di dokumentonan di identifikashon komo parti di un enkuesta estadístiko. E organisashon ta konsehá residente nan pa duna informashon personal si nan tin duda tokante e identidat di un persona ku ta presentá su mes komo trahadó di CBS.

Verifikashon ta posibel

Personanan ku ke verifiká identidat di un trahadó òf ku tin pregunta tokante un bishita òf enkuesta por tuma kontakto direktamente ku CBS Hulanda Karibense na telefòn 717 8676. CBS ta hasi un yamada na publiko pa yuda prevení mal informashon dor di kompartí solamente mensahenan ku ta bin for di fuentenan ofisial i konfiabel.

Advertisement