Último lunanan a keda marká pa varios teremoto fuerte na Sur di Amérika, loke a lanta preguntanan na diferente pais di e region tokante preparashon pa desasternan natural. E pregunta ku algun residente ta hasi awor ta si Boneiru ta prepará pa un teremoto fuerte den kaso ku un evento sísmiko impaktante ta tuma lugá den nos region.

Na 24 di yüni 2026, Venezuela a keda golpiá pa dos teremoto fuerte di magnitut 7.2 i 7.5. E desasternan a kousa miles di morto, miles di herido i daño ekstensivo na infrastruktura, kas i edifisionan públiko. E evento a keda konsiderá komo un di e pihó desasternan natural den historia resiente di e pais. 

Advertisement

Mas despues, riba 10 di ougùstùs, un teremoto di magnitut 7.4 a dal den e partinan oksidental di Colombia. E temblor, konsiderá e mas fuerte den e siglo aktual pa Colombia, a kousa morto, herido i daño material na diferente siudat i komunidatnan. 

Awor, riba 20 di ougùstùs, Perú a registrá un otro teremoto fuerte. E Instituto Geofísiko di Perú a midi e magnitut na 7.2, miéntras e USGS a reportá un magnitut di 6.7. Ounke e temblor a keda sintí na diferente region di e pais, e profundidat di e evento a limitá daño i no a wordu reportá víktimanan mortal na momento di publikashon. 

Boneiru no ta situá den un área ku ta eksperensiá teremotonan grandi regularmente manera Perú òf Chile, pero e isla ta parti di un region kaminda aktividat sísmiko sí ta eksistí. E teremoto di magnitut 7.3 ku a dal dilanti di kosta di Venezuela a keda sintí den diferente isla den Karibe. 

E serie di teremotonan resiente ta lanta pregunta tokante preparashon lokal. Tin plan di emergensia aktualisá? Infrastruktura krítiko manera skolnan, sentronan médiko i edifisionan gubernamental ta prepará pa resistí un temblor fuerte? I e servisionan di emergensia tin kapasidat pa reakshoná rapidamente si un desastre natural afektá Boneiru?

Ounke no por pronostika eksaktamente unda òf ki ora un teremoto lo sosodé, preparashon ta un di e elementunan mas importante pa limitá daño i protehá bida di hende.

Ku e desasternan resiente na Venezuela, Colombia i Perú, ainda fresku den memoria, e tema di preparashon pa eventual eventonan sísmiko ta un punto importante pa Boneiru.