Temporada di orkan Atlántiko 2026 a kuminsá ofisialmente dia 1 di yüni i lo dura te ku 30 di novèmber, markando komienso di seis luna di monitoreo di tempu tropikal den Oseano Atlántiko, Laman Karibe i Golfo di Mexico.

Ounke pronóstikonan pa e aña akí ta sugerí un kantidat di tormenta mas abou ku promedio kustumbrá, ekspertonan di meteorologia ta urgi habitantenan di islanan i areanan kostero pa keda alertá. Nan ta konsehá pa revisá plannan di emergensia i pa keda al tanto di informashonnan relevante durante henter e periodo akí.

E lista di nòmbernan asigná pa e temporada di orkan Atlántiko 2026 dor di Organisashon Mundial di Meteorologia ta inkluí: Arthur, Bertha, Cristobal, Dolly, Edouard, Fay, Gonzalo, Hanna, Isaias, Josephine, Kyle, Leah, Marco, Nana, Omar, Paulette, Rene, Sally, Teddy, Vicky i Wilfred.

Den transkurso di e temporada, sistemanan tropikal ku desaroyá lo risibí e nòmbernan akí siguiendo órden alfabétiko. Den kaso ku un siklon kousa daño ekstremo òf hopi morto, outoridatnan por retirá e nòmber ei pa evitá su uso den añanan binidero.

Pa habitantenan di Karibe, partikularmente esnan di e islanan ABC (Aruba, Boneiru i Kòrsou), e inisio di e temporada aki ta sirbi komo un yamada di atenshon krusial pa preparashon. Ounke e islanan akí ta keda pafó di e area kaminda orkannan sa pasa mas tantu, sistemanan tropikal tòg por kousa áwaseru pafó di proporshon, laman brutu, inundashon na kosta i paralisá tantu tráfiko aéreo komo marítimo.

E periodo mas aktivo di e temporada di orkan ta normalménte entre mitar di ougùstùs i mitar di òktober, ku sèptèmber ta e luna ku histórikamente a registra mas aktividat tropikal. Outoridatnan enkargá ku maneho di desaster ta urgi famianan pa keda vigilante durante henter e temporada, rekomendando pa nan monitor aktualisashonnan meteorológiko ofisial, repasá nan plannan di evakuashon i perkurá pa tin un provishon básiko pa kualke emergensia.

Advertisement