Diputado Joselito Statia (MPB) a entregá su retiro komo miembro di Kolegio Ehekutivo di Boneiru. E desaroyo ta sigui despues di simannan di tenshon entre e dos partnernan prinsipal den koalishon UPB i MPB.

Segun informashon ku nos redakshon a risibí for di diferente fuente, relashon entre UPB i MPB a deteriorá konsiderablemente durante último simanannan. UPB lo a pone un demanda kla na MPB pa baha Statia for di su puesto komo diputado. Tambe lo a indiká ku si esaki no sosedé, frakshon di UPB lo retirá su sosten polítiko for di e diputado.

Diferente fuente ta indiká ku e diferensianan tabata relashoná ku ehekushon di diferente akuerdo i kompromisonan ku a keda hasí durante formashon di e koalishon. Aparentemente tabatin mal kontentu serka UPB ku Statia no tabata aktua konforme e palabrashonnan ku tabata eksistí entre e partidonan.

Te na momento di publikashon, UPB ni MPB no a sali ku un deklarashon ofisial tokante e motibonan eksakto tras di e situashon. Sinembargo, retiro di Statia ta un señal kla ku e relashon entre e dos partidonan a yega na un punto krítiko.

Statia a keda huramentá komo diputado na kuminsamentu di april 2026 komo parti di e koalishon nobo formá pa UPB, MPB i frakshon Silberie. E tabata karga diferente portafolio importante, inkluyendo Direktorado di Planifikashon i Desaroyo. 

Ku e retiro aki, no ta sigur ainda tokante futuro di e koalishon i stabilidat di gobernashon na Boneiru. Ainda no ta kla ken lo remplasá Statia ni si e desaroyo aki lo tin konsekuensia adishonal pa e balansa polítiko den Konseho Insular.

Mas informashon lo sigui na medida ku e partidonan involukrá reakshoná ofisialmente riba e situashon.

Advertisement