Boneiru tin mas ku 27.000 habitante i, basá riba e kantidat di habitante, e isla ta kai den klase 5 di "Rechtspositiebesluit politieke gezagdragers BES". E lei aki ta regulá salario i kompensashon di lidernan polítiko manera gezaghèber, diputado i miembronan di Konseho Insular.

Pa determiná e salario i kompensashonnan di polítikonan den e islanan BES, e islanan ta wordo klasifiká segun e kantidat di habitante:

Klase 1: 0 – 10.000 habitante
Klase 2: 10.001 – 15.000 habitante
Klase 3: 15.001 – 20.000 habitante
Klase 4: 20.001 – 25.000 habitante
Klase 5: 25.001 habitante òf mas

Lidernan polítiko no ta un ambtenar. P’esei nan no ta kai bou di lei di ambtenaar BES, sino bou di lei spesífiko pa polítiko.

Diputado

Un diputado na Boneiru den klase 5 ta risibí un salario bruto di USD 109.702 pa aña, ku ta igual na aproksimadamente USD 9.142 pa luna. Aparte di e salario, e diputado ta risibí un toelage di 6% pa kubri gastonan di representashon i otro gastonan relashoná ku e funshon. E toelage aki ta sali na aproksimadamente USD 6.582 pa aña, òf mas o ménos USD 549 pa luna. Ademas, e diputado tin derecho riba un bonifikashon di fakansi i un bonifikashon di fin di aña, segun e mesun prinsipionan ku ta apliká pa ambtenarnan den servisio den Karibe Hulandes.

Gezaghèber

Un gezaghèber den klase 5 ta risibí un salario bruto di USD 138.834 pa aña, ku ta representá aproksimadamente USD 11.570 pa luna. Pa kubri gastunan di representashon i otro gastunan ku ta bin ku e funshon, gezaghèber ta risibí un toelage di 10%di e salario. Esaki ta igual na aproksimadamente USD 13.883 pa aña, òf USD 1.157 pa luna. Tambe e gezaghèber tin derecho riba bonifikashon di fakansi i bonifikashon di fin di aña.

Miembronan di Konseho Insular

Miembronan di Konseho Insular ta risibí kompensashon pa nan trabou i kontribushon pa gastunan. Den klase 5, e kompensashon pa trabou ta USD 15.047 pa aña, ku ta mas o ménos USD 1.254 pa luna. Ademas, nan ta risibí un kompensashon pa gastunan di USD 1.850 pa aña, òf aproksimadamente USD 154 pa luna. 

Kompensashon pa komishon

Miembronan di komishon di Konseho Insular por risibí un kompensashon pa asistí reunion. Den klase 5, e suma ta máksimo ta USD 97 pa reunion. Un persona ku ta miembro di Konseho Insular no ta risibí e kompensashon aki si e ta parti di e mesun komishon. Tambe un ambtenar ku a keda nombrá komo miembro di komishon no ta risibí e kompensashon. 

Salario di Ambtenar

Un eilandsecretaris no ta un polítiko, sino un ambtenar. E ta e ambtenar di mas haltu den Kolegio Ehekutivo i su salario ta keda regulá segun sistema di salario pa ambtenarnan BES. E salario di un eilandsecretaris i tur otro ambtenarnan ta keda determiná segun skal di salario ku ta pertenesé na e funshon, e responsabilidat, peso di trabou i eksperensia di e persona. E funshon di eilandsecretaris ta den skalnan di mas haltu. Na 2024, eilandsecretaris ta den skal 17, ku un salario bruto ku ta varia entre: USD 8.810 te ku USD 9.910 pa luna. E suma eksakto ta dependé di e trede den e skal. 

Pa komparashon, e struktura di nivelnan di ambtenar ta:

Schaal 17 – Eilandsecretaris
USD 8.810 – USD 9.910 bruto pa luna

Schaal 16 – Direktor
USD 8.040 – USD 9.140 bruto pa luna

Schaal 15 – Afdelingshoofd
USD 7.410 – USD 8.360 bruto pa luna

Schaal 14 – Onderafdelingshoofd
USD 6.555 – USD 7.505 bruto pa luna

Schaal 13 – Adviseur C / Portefeuilleadviseur
USD 5.835 – USD 6.685 bruto pa luna

Schaal 12 – Portefeuillesecretaris
USD 5.070 – USD 5.920 bruto pa luna

Schaal 11 – Konsehero di Maneho B
USD 4.390 – USD 5.240 bruto pa luna

Schaal 8 – Officemanager
USD 2.850 – USD 3.360 bruto pa luna

Aparte di e salario mensual, un ambtenar tin derecho riba kondishonnan manera bonifikashon di fakansi (9.33%), bonifikashon di fin di aña (13e maand) i otro benefisionan òf toelagen si nan ta apliká.

Eilandgriffier

Eilandgriffier, ku ta e konsehero ambtenar mas haltu di Konseho Insular, normalmente ta keda remunerá na un nivel igual òf komparabel ku e eilandsecretaris.

Arbeidsvoorwaardenakkoord ABVO - OLB

Segun último informashon ku redakshon di Energia TV a risibí, OLB na 2024 a drenta den un arbeidsvoorwaardenakkoord nobo ku vakbond ABVO pa periodo 2024 - 2026.

Ta trata di un arbeidsvoorwaardenakkoord i no un CAO. Un arbeidsvoorwaardenakkoord ta un akuerdo entre dunadó di trabou i representantenan di trahadó tokante kambio den kondishonnan laboral, manera salario, bonifikashon i otro benefisionan.

Un CAO (Collectieve Arbeidsovereenkomst) ta un akuerdo kolektivo mas amplio ku ta regla kondishonnan laboral di un grupo di trahadó. Den un CAO normalmente ta keda stipulá asuntonan manera salario, oranan di trabou, fakansi, permiso, benefisionan, obligashonnan di trahadó i dunadó di trabou, i otro reglanan laboral.

E akuerdo di OLB i ABVO a drenta na vigor ku retroaktividat for di 1 di yanüari 2024. Den e akuerdo ta inkluí struktura di salario, kaminda e skalanan di salario a keda adaptá. Pa empleadonan,  e sistema a trese un oumento di salario segun e struktura aktualisá, ku un mehoramentu mínimo di USD 300 bruto.

Tambe e Bashi-Premie anual a keda oumentá di USD 251 bruto pa USD 500 netto. Empleadonan ku ta na e último trede di nan skal di salario i ku tin un evaluashon positivo por risibí un pago adishonal kada dos aña, e suma a keda oumentá di USD 200 pa USD 300 netto.

E akuerdo ta inkluí tambe kambionan den gratifikashon pa añanan di servisio. Empleadonan ku kumpli 35 òf 45 aña di servisio por tin derecho riba un gratifikashon segun e akuerdo.

E implementashon di e akuerdo a keda hasi ku efekto retroaktivo for di 1 di yanüari 2024.

Advertisement