Durante e fin di siman, lagun siudadano a desplegá pankarta na diferente lugá na Boneiru pa ekspresá desakuerdo ku e kontrato entre Water- en Energiebedrijf Bonaire (WEB) i e kompania israelí IDE Technologies, aktivo den sektor di teknologia di awa i desalinisashon.

Den kuadro di e protesta, Alfred Philip Burgos a dirigí un karta na e presidente i miembronan di Eilandsraad di Boneiru, pidiendo mas transparensia i akshon tokante e koperashon entre WEB i IDE Technologies.

Advertisement

Den su karta, Burgos ta pidi pa duna informashon tokante e akuerdonan i obligashonnan kontraktual entre e dos partidonan, den e medida ku e informashon por ta públiko. Tambe e ta pidi pa duna klaridat tokante e papel di Bestuurscollege den e proseso di formashon i aprobashon di e koperashon.

Ademas, Burgos ta proponé pa investigá si tin otro kompania ku por ofresé e mesun servisio tékniko komo alternativa. E ta pidi tambe pa evaluá e aspektonan di derecho humano, étika i derecho hurídiko relashoná ku e kontrato.

Den su karta, Burgos ta referí na e violashonnan grave di derecho humano i e situashon na Gaza, i ta argumentá ku Boneiru mester tene kuenta no solamente ku interesnan ekonómiko i tékniko, sino tambe ku responsabilidat sosial i respèt pa derecho humano i derecho internashonal.

Burgos ta pidi pa trata e tema riba término kòrtiku i pa informá Eilandsraad i pueblo di Boneiru di forma transparente tokante e resultado di e evaluashon i posibel siguiente pasonan. E ta pidi tambe pa risibí un kontesta por eskrito tokante e manera ku su petishon lo wordu atendé.